Gazetarëve të BIRN dhe të disa mediave të tjera iu mohua akreditimi për të raportuar për një tubim në kryeqytetin boshnjak të mbajtur nga presidenti turk Recep Tayyip Erdogan para sondazheve zgjedhore të vendit të tij.
BIRN dhe disa media të tjera nuk u akredituan për të mbuluar një tubim masiv në mbështetje të presidentit turk Rexhep Tajip Erdogan të dielën në Sarajevë.
Organizatori zyrtar i tubimit, Bashkimi i Demokratëve Europianë të Turqisë, i cili së fundmi krijoi një organizatë simotër lobuese në Bosnjë, Bashkimi i Demokratëve Ballkanik Europianë, nuk miratoi akreditime për BIRN dhe disa gazetarë të tjerë.
“Ju nuk jeni në listë dhe kjo listë është miratuar nga qeveria, nga ambasada e Turqisë,” tha për korrespondentin e BIRN në Sarajevë Lemija Demirbas, e cila ishte përgjegjëse për akreditimet e shtypit.
BIRN ka kontaktuar disa herë me Bashkimin e Demokratëve Europianë dhe me Ambasadën Turke në Sarajevë, por nuk ka marrë asnjë shpjegim se përse janë mohuar akreditimet.
Michael Colborne, një gazetar i pavarur nga Kanadaja, tha për BIRN se nuk qe kurrë e qartë se kush ishte përgjegjës për akreditimet.
“Autoritetet boshnjake duhet të kishin vendosur se kush do të marrë akreditimet, por në fund ky ishte një vendim arbitrar i ambasadës turke,” tha Colborne.
“Unë arrita të hyja, sepse njihnim një gazetar tjetër, i cili kishte njohje të mira dhe që na futi brenda pa kartat e shtypit,” shtoi ai.
Gazetarë të tjerë e mbuluan eventin nga jashtë sallës Zetra ku ai u mbajt në Sarajevë.
