Një kanton boshnjak dhe qeveria shtetërore po debatojnë ashpër mbi rastin e fundit të një vargani të bllokuar emigrantësh, me secilën palë që akuzon palën tjetër për veprime penale.
Pasi policia në kantonin Hercegovina-Neretva, një nga dhjetë kantonet në entitetin e Federatës së Bosnjës, ka ndalur një vargan emigrantësh të premten e kaluar, ka pasur shumë akuza midis kantonit dhe qeverisë së shtetit në lidhje me faktin nëse policia kishte apo jo të drejtë ta ndalonte atë.
Ljubo Besliç, kryetari i Mostarit, qyteti më i madh në kanton, tha të mërkurën për N1 se çështjet e sigurisë në kantone bien nën juridiksionin e këtyre njësive.
Duke iu përgjigjur akuzave se kantoni kishte bërë një “grusht shteti”, kryetari tha se ministri i sigurimit i shtetit boshnjak Dragan Mektiç “ishte ai që kreu një grusht shteti”.
Besliç është një anëtar i Bashkimit Demokratik Kroat, HDZ, partia kryesore kroate e Bosnjës, e cila në një njoftim për shtyp tha të martën se qeveria shtetërore nuk e kishte miratuar karvanin, po ashtu as autoritetet lokale në Mostar.
“Vendimi për të dërguar një karvan me emigrantë drejt të kantonit të Hercegovina-Neretvës nuk u miratua nga Këshilli i Ministrave dhe ndodhi pa një marrëveshje paraprake me institucionet vendore në Mostar,” thuhet në njoftimin për shtyp.
Megjithatë, Denis Zvizdiç, kryetar i Këshillit të Ministrave të Bosnjës, në një tjetër deklaratë për shtyp, këmbënguli se shteti kishte të drejtën të merrte këto vendime.
“Kushtetuta e Bosnjës thotë se institucionet e nivelit shtetëror janë vendimmarrësit e vetëm kur bëhet fjalë për çështje që kanë të bëjnë me migracionin, vizat dhe azilin,” thuhej në njoftimin për shtyp që dha të mërkurën zyra e Zvizdiçit.
Ministri i Sigurisë Mektiç e përshkroi lëvizjen e Ministrisë së Brendshme kantonale si një grusht shteti virtual të premten.
“Që një komisioner policie të mos lejojë institucionet shtetërore të zbatojnë detyrat e tyre kushtetuese është një lloj grushti serioz, sipas mendimit tim. Kjo është një goditje ndaj rendit kushtetues të shtetit,” tha Mektiç për N1.
Ilija Lasiç, komisioneri i policisë që urdhëroi oficerët të ndalonin vargun me rreth 300 emigrantë, u thirr për të shpjeguar veprimet e tij në Policinë e Shtetit të premten në mbrëmje, por detajet nuk janë zbuluar ende.
Davor Bunoza, avokati i Lasiçit, nuk iu përgjigj pyetjeve të BIRN për të konfirmuar raportet për një padi të mundshme kundër ministrit Mektiç për shpifje, siç njoftuan disa media.
Emigrantët po bëhen një problem në rritje në Bosnje. Grupe emigrantësh dhe refugjatësh kanë ngritur një kamp të improvizuar në një park pranë bashkisë në Sarajevë, ndërsa autoritetet e Bosnjës përpiqen të gjejnë një zgjidhje jo vetëm për ta, por për një numër gjithnjë e më të madh njerëzish që po e përdorin vendin si një rrugë tranziti drejt Europës Perëndimore.
Qindra mijëra emigrantë kaluan përmes të ashtuquajturës “Rruga Ballkanike” në vitin 2015, duke u përpjekur të arrinin në Europën Perëndimore, por Bosnja nuk ishte pjesë e asaj rruge, e cila u mbyll në mënyrë efikase në mars 2016.
Emigrantët pastaj filluan të kërkonin për rrugë të reja nga Turqia dhe Greqia në Europën Perëndimore përmes Malit të Zi, Shqipërisë, Serbisë dhe së fundmi Bosnjës.
