Partia Demokratike e Socialistëve e Malit të Zi fitoi në shumicën e komunave në zgjedhjet lokale që u mbajtën të dielën, në mes të parregullsive të shumta dhe raportimeve për incidente të dhunshme.
Partia Demokratike e Socialistëve në pushtet, DPS, fitoi shumicën e votave në dhjetë nga 12 komuna të dielën, por do të jetë në gjendje të formojë një administratë të vetën vetëm në pesë prej tyre.
Rezultatet paraprake tregojnë se DPS, e drejtuar nga lideri veteran i vendit Milo Djukanoviç, siguroi një shumicë absolute në kryeqytetin Podgoricë për herë të parë që nga fillimi i viteve 2000.
Në shumicën e komunave, partia qeverisëse përmirësoi ndjeshëm performancën e saj në zgjedhjet lokale në 2014.
DPS tha se ajo arriti një “fitore të madhe” në zgjedhje dhe se rezultatet konfirmojnë dominimin e partisë dhe angazhimin e publikut ndaj rrugës së vendit drejt BE-së.
Sipas rezultateve paraprake, DPS do të ketë 32 nga 61 vendet në parlamentin lokal të Podgoricës. Demokratët e opozitës dhe Lëvizja URA do të kenë 17 vende dhe koalicioni i Partisë Popullore Socialiste dhe Frontit Demokratik do të ketë tetë.
DPS-ja e Djukanoviçit gjithashtu arriti një fitore në komunat e Savnikut, Zabljakut dhe Danilovgradit, Bijelo Poljes dhe Pljevljas.
Në të tjerat, ajo do të duhet të kërkojë një koalicion me Social Demokratët, SD, të udhëhequr nga kryetari i parlamentit të vendit Ivan Brajoviç, ose me Partinë Boshnjake dhe partitë e vogla etnike shqiptare.
Në shumicën e komunave, opozita ka dalë dukshëm më keq sesa në zgjedhjet presidenciale të prillit dhe në zgjedhjet e përgjithshme në tetor 2016. Ajo ka pretenduar se zgjedhjet lokale ishin jodemokratike dhe të padrejta.
Aleksa Beciç, lideri i partisë më të fuqishme të opozitës, Demokratët, tha se zgjedhjet u mbajtën në një atmosferë anti-demokratike – problematike për një vend që është kandidat për anëtarësim në BE.
“Nuk mund të jemi të kënaqur me rezultatet e përgjithshme të opozitës. Ka ende shumë trishtim,” tha ai.
Zgjedhjet e së dielës u shoqëruan me një sërë parregullsish në qendrat e votimit dhe listat zgjedhore, raportojnë organizatat lokake.
Qendra për Tranzicion Demokratik, një nga organizatat lokale, raportoi me qindra abuzime në procesin zgjedhor në Podgoricë, përfshirë shkelje të sekretit të votës dhe shkelje të procedurës së votimit postar.
Në një qendër votimi në Podgoricë u sulmuan katër kandidatë të opozitës për administratën lokale dhe njëri prej tyre pësoi lëndime serioze. Opozita pretendoi se ata u sulmuan nga aktivistë të DPS-së, gjë të cilën partia qeverisëse e mohoi.
Prokuroria malazeze ka konfirmuar se ka nisur një hetim dhe policisë i është dhënë urdhër të kryejë kontrolle për të përcaktuar se çfarë ndodhi në qendrat e votimeve të dielën.
Drejtoria e Policisë tha gjithashtu se janë raportuar edhe 21 raste dhune dhe shkelje të procedurave të votimit në 11 komuna, shumica e tyre në kryeqytetin Podgoricë.
Ndryshe nga zgjedhjet e mëparshme, votimi nuk u monitorua nga vëzhgues të huaj.
Rreth 310,000 votues u regjistruan për zgjedhjet e së dielës në 11 komuna – pothuajse gjysma e popullsisë së vendit.
Në shumicën e qyteteve në Mal të Zi, pjesëmarrja ishte mbi 50 për qind, sipas zyrtarëve nga komisionet zgjedhore komunale.
Në Podgoricë, e cila përbën më shumë se një të tretën e elektoratit të përgjithshëm, pjesëmarrja ishte 64 për qind, njësoj si në zgjedhjet presidenciale të muajit të kaluar.
