Ministri i jashtëm i Maqedonisë tha në Bruksel se ai nuk ishte zhgënjyer nga dyshimet e disa vendeve anëtare të BE-së për nisjen e bisedimeve të pranimit të vendit të tij në BE këtë vit.
“Mrekullitë janë të mundshme,” tha të hënën ministri i jashtëm maqedonas Nikola Dimitrov në Bruksel, kur iu kërkua të komentonte mbi skepticizmin e shprehur nga disa vende anëtare të BE-së në lidhje me nisjen këtë vit të bisedimeve për anëtarësimin e vendit të tij.
Dimitrov, i cili po merr pjesë në Këshillin e Punëve të Jashtme të BE-së të hënën dhe të martën në Bruksel, tha për agjencinë e lajmeve MIA të Maqedonisë se, siç pritej, Franca dhe Holanda ishin vendet anëtare të BE-së që ishin më skeptike rreth hapjes së bisedimeve të pranimit të vendit të tij këtë vit.
“Është mirë që jemi të vetëdijshëm se nuk është e lehtë. Konsolidimi i brendshëm i BE-së është komplementar dhe nuk kundërshton konsolidimin e Ballkanit,” tha Dimitrov.
Ai shprehu shpresë se një përparim i parashikuar në bisedimet midis Maqedonisë dhe Greqisë në lidhje me çështjen e emrit të Maqedonisë do t’i bindte skeptikët për të kundërtën.
“Nëse ndodh kjo gjë historike, do të jetë një mundësi për të gjithë Europën për të krijuar sukses. Ne nuk jemi në gjendje të kemi luksin për të humbur mundësi historike,” tha Dimitrov për MIA.
Komisioni Europian këtë vit rekomandoi hapjen e negociatave me Shqipërinë dhe Maqedoninë. Ata shpresojnë për një dritë jeshile për bisedimet e pranimit në BE në samitin e BE-së në qershor.
Por disa vende duke përfshirë Francën, Holandën dhe Gjermaninë dukshëm nuk arritën të angazhohen në këtë proces në samitin e fundit BE-Ballkani Perëndimor i mbajtur në Sofje në mes të majit.
Presidenti francez Emmanuel Macron i tha samitit se ai nuk favorizonte asnjë lëvizje të tillë derisa “ne të kemi të gjitha siguritë dhe të gjitha reformat të jenë kryer”.
Kancelarja gjermane Angela Merkel tha se çështja e zgjerimit “mbetet për samitin e BE-së në qershor”.
Pasi u kthye nga samiti i Sofjes, kryeministri shqiptar Edi Rama fajësoi problemet e brendshme të BE-së për një vendim të mundshëm negativ për hapjen e negociatave me Shqipërinë dhe Maqedoninë.
“Është e dukshme dhe ne nuk kishim nevojë të shkonim në Sofje për të mësuar se, aktualisht, axhendat tona nuk janë plotësisht të pajtueshme,” tha ai.
“BE-ja është në kulmin e një debati të brendshëm dhe kjo nuk e ndihmon objektivin tonë. Megjithatë, unë mbetem optimist,” shtoi ai.
Një draft dokument i pretenduar, që supozohet se është propozuar nga disa vende të BE-së dhe u zbulua fundjavën e kaluar në mediat maqedonase, shkaktoi pasiguri të mëtejshme.
Dokumenti i pretenduar këshillonte Bashkimin Europian të shtyjë dhënien e dritës së gjelbër për bisedimet e pranimit të Shqipërisë dhe Maqedonisë këtë vit, duke deklaruar se ato nuk janë gati.
Në rastin e Shqipërisë, dokumenti theksonte se vendi nuk ka reforma të mjaftueshme gjyqësore dhe mbetet pas në luftën kundër korrupsionit dhe krimit të organizuar.
Në rastin e Maqedonisë, dokumenti theksoi se pavarësisht ndryshimeve në atmosferën e përgjithshme në vend, vendi nuk mund të demonstrojë progres të qartë në zbatimin e reformave urgjente që kanë përparësi.
Ai vë në dukje se reformat gjyqësore janë ende “në zhvillim e sipër”, që de-politizimi i administratës shtetërore është i ngadaltë dhe thotë se lufta kundër korrupsionit dhe krimit të organizuar ende nuk ka dhënë rezultate të mjaftueshme.
