“Fëmijët, viktima të dhunës dhe ngacmimeve seksuale në Shqipëri janë lënë jashtë vëmendjes institucionale”, thonë organizatat e të drejtave të fëmijëve, ndërsa theksojnë se ligjvënësit duhet të miratojnë urgjentisht ashpërsimin e masave në Kodin Penal për autorët e këtyre krimeve.
Një grup organizatash të Rrjetit Kombëtar “Vepro për Fëmijët” protestuan të mërkurën përpara Kuvendit, ku kërkuan nga autoritetet të tregojnë kujdes të veçantë në dhënien e vendimeve gjyqësore që lidhen me të akuzuarit për dhunë seksuale ndaj fëmijëve dhe të miturve.
Aktivistët gjithashtu i përsëritën ligjvënësve kërkesën e bërë dy vite më parë për të miratuar urgjentisht ndryshimet në Kodin Penal dhe atë të Procedurës Penale, ku kërkohen dënime më të rënda për abuzuesit seksualë, parashkrimi nga Kodi Penal të krimeve ndaj fëmijëve të cilat ndodhin online, dënimin e ngacmimit seksual, si dhe ndryshimin e nenit të pornografisë, i cili ata pretendojnë nuk i mbron sa duhet fëmijët.
Organizatat në mbrojtje të fëmijëve gjithashtu nxitën Prokurorinë e Rrethit Gjyqësor Korçë, të apelojë urgjentisht vendimin e dhënë nga gjykata me 4.8 vite burg për një 54-vjeçar, i cili abuzoi seksualisht një 14-vjeçare dhe i shkaktoi asaj shtatzëni të padëshiruar.
Sipas Altin Hazizaj, drejtorit të Qendrës për Mbrojtjen e të Drejtave të Fëmijëve në Shqipëri rasti i 14-vjeçares nga Pogradeci është një ilustrim i hidhur i mosveprimit shtetëror në fushën e dhunës seksuale ndaj fëmijëve dhe të miturve.
“Shohim me shqetësim se gjykatat dënojnë vetëm gjysmën e krimeve që referohen nga policia, pra këta grabitqarë seksualë lihen të lirë,” tha për BIRN Hazizaj.
“Shqipëria nuk ka një regjistër të të dënuarve për dhunë seksuale ndaj fëmijëve, kështu pedofilët mund të punësohen pa problem atje ku ka fëmijë,” shtoi ai, duke theksuar se pa këtë regjistër e gjithë shoqëria është e pambrojtur.
Duke qartësuar edhe më shumë situatën e fëmijëve në vend, Hazizaj tha se Shqipërisë i mungojnë gjithashtu shërbime të traumës për fëmijët viktima të dhunës seksuale. Sipas tij, autoritetet janë fokusuar vetëm në një kategori fëmijësh, si për shembull fëmijët në situatë rruge, ata jetimë apo me aftësi të kufizuara, por kanë harruar rreth 70 për qind të fëmijëve të tjerë.
“Zero lek shkojnë për shërbime sociale për fëmijët viktima të dhunës. Kush i mbështet ata? Situata është problematike si në nivel kombëtar, edhe në nivel lokal,” vazhdoi Hazizaj i shqetësuar.
“Kjo mungesë e financimit po çon në shkelje të të drejtave të fëmijëve dhe kjo është e papranueshme,” përfundoi ai.
Në Ditën Ndërkombëtare të Fëmijëve, 1-Qershor, dhjetëra aktivistë organizuan në Tiranë një marshim proteste, ku i bënë thirrje qeverisë të zbatojë angazhimet e marra nga Konventa e të Drejtave të Fëmijëve, ndërsa i ranë kambanave të alarmit për mungesë shërbimesh, shfrytëzim, si dhe varfëri të fëmijëve shqiptarë.
