Pas sekuestrimit të një sasie rekord parash të padeklaruara në portin e Durrësit, opozita ka akuzuar kreun e grupit parlamentar të PS-së si të përfshirë në pastrimin e parave të grupeve kriminale.
Katër persona u arrestuan dhe dy të tjerë janë shpallur në kërkim nga Policia e Shtetit si autor të dyshuar për transportimin në Shqipëri të një sasie prej 3,3 milion eurosh, para këto që u sekuestruara mëngjesin e së djelës në portin e Durrësit.
Policia njoftoi se ka arrestuar në kushtet e flagrancës 61 vjeçarin Agim Çeku i lindur në Luz i Madh dhe banues në Durrës, 40 vjeçarin Alban Mollaymeri i lindur dhe banues në Tiranë, si dhe 41 vjeçarin Edi Lika sëbashku me djalin e tij 19 vjeçar Klevis Lika.
Katër të arrestuarit dyshohet se kanë mundësuar transportin e parave nëpërmjet mjeteve motorike drejt Shqipërisë, ndërkohë që policia ka shpallur në kërkim dhe dy personave të tjerë.
“Gjatë kontrollit të ushtruar në Pikën e Kalimit Kufitar Durrës në automjetin tip ‘Bizark’ të drejtuar nga shtetasi Agim Çeku dhe pronar Klevi Lika (Cani), në 2 automjete të ngarkuar në të, tip ‘Toyota’ janë gjetur një shumë e konsiderueshme eurosh dhe franga zviceriane, të padeklaruara,” saktësoi Policia e Shtetit pas pas 24 orë spekulimesh në media.
Sasi e parave u gjet e fshehur në disa thasë ndërkohë që në banesën e Agim Çekut policia gjeti armë, municione dhe radio policie.
“Janë sekuestruar në cilësinë e provave materiale, 3,366,800 euro dhe 100 euro që dyshohet të jenë të falsifikuara; 80,000 franga zvicerane, 10 automjete, 1 armë kallashnikov me 2 krehra fishekë, 1 radio policie,” shkruhet në njoftimin zyrtar.
Policia beson se personat e shpallur në kërkim janë dhe shtetasit tek të cilit do të përfundonte sasia e konsiderueshme e parave, për të cilët, për efekt sekreti hetimor njofton vetëm inicialet e tyre.
“Nga hetimet paraprake, Policia e Shtetit ka të dhëna të besueshme se ngarkesa e sekuestruar ishte e porositur nga shtetasit E.V. dhe A.V., tashmë të shpallur në kërkim,” vijon deklarata.
Mbërritja e një sasie të konsiderueshme parash nëpërmjet një makine Toyota Yaris u paralajmërua disa ditë më parë nga Kryetari i Partisë Demokratike, Lulzim Basha.
Në seancën parlamentare të enjtes, lideri i opozitës akuzoi Kryetarin e Grupit Parlamentar të Partisë Socialiste Taulant Ballën, si garantues të marrëveshjeve me krimin e organizuar.
“Ai që po zgërdhihet më shumë ka qenë para tri ditëve në Shqipëri. Ai zgërdhitësi ka marrë “Toyta Yaris”-in. Por t’u zbulua Toyota, bashkë me 1.5 milion euro të drogës brenda,” tha Basha, deklaratë kjo që shkaktoi ovacione në sallën e Kuvendit.
Pas sekuestrimit të sasisë së parave, edhe Policia e Shtetit pranoi se kishte pasur sinjalizime nga agjenci zbatuese për mbërritjen e makinës “miliona euroshe”.
“Policia e Shtetit është vënë në dijeni nga burimet e saj vendase në datën 20 Qershor 2018, ditën e mërkurë, për një karoatrec me targa AA 120 SP, që pritej të transportonte disa auto vetura, e mes tyre një mjet me sasi eurosh të padeklaruara, pa specifikuar tipin e automjeteve dhe as origjinën e vendit,” sqarohet në njoftim zyrtar.
Bazuar në këtë informacion policia thotë se është hartuar dhe plani operacional i strukturave përgjegjëse për identifikimin dhe sekuestrimin e kësaj ngarkese.
“Në datë 24 Qershor 2018, në Portin e Durrësit në orën 07:30, mbërriti nga Belgjika një trajler tip “Bizark” me 9 automjete, përmes Portit të Barit, Itali. Policia Kufitare, mbi bazën e porosisë së marrë në datë 20 Qershor, ka bërë identifikimin dhe ndalimin e mjetit,” shton më tej Policia e Shtetit, duke garantuar se hetimet po vijojnë për zbardhjen e plotë të rrethanave të ngjarjes dhe zbulimin e personave të tjerë të implikuar.
Ngjarja e sekuestrimit të sasisë më të madhe në vend po hetohet nga Prokuroria e Rrethit të Durrësit e cila për katër personat e arrestuar ka nisur procedimin penale për veprën “pastrimi i produkteve të veprës penale ose veprimtarisë kriminale e kryer në bashkëpunim”, ”prodhimi dhe mbajtja pa leje e armëve luftarake dhe e municionit” dhe ”falsifikimi i monedhave”.
Sekuestrimit i sasisë prej 3.3 milion euro ka rikthyer akuzat e opozitës për lidhje të mazhorancës me krimin e organizuar.
Basha deklaroi të hënën se paratë ishin destinuar për një nga grupet kriminale në qytetin e Elbasanit dhe se Taulant Balla ishte garantuesi i tyre.
“Paratë janë të një prej bandave më aktive në Elbasan dhe në të gjithë Shqipërinë. Balla kishte marrëveshje për të garantuar hyrjen e këtyre parave pa problem në Shqipërinë,” tha Basha, duke shtuar se plani për këtë operacion ishte dekonspiruar.
Për kryetarin e Partisë Demokratike qeveria është përfshirë në operacione të pastrimit të parave.
“Kemi edhe kryetarin e grupit parlamentar të PS që merret me pastrimin e parave të drogës. Pakti ka qënë për 1.5 milion euro dhe marrëveshja është garantuar nga Taulant Balla . Çfarë e lidh Tahirin, Xhafën, Ballën dhe Veliajn, përveç Edi Ramës? Trafiku i drogës dhe ndërtimi i kullave, të cilat do të ndërtohen për të pastruar paratë e krimit,” nënvizoi Basha.
Akuzat e opozitës u hodhën poshtë nga Kreytari i Grupit Parlamentar të Partisë Socialiste, Taulant Balla, i cili në një koment në rrjetin social Facebook i konsideroi ato si teatër.
“O Babale! Mjerë kush të beson ty akoma dhe taksirati ynë që kemi përballë një opozitë që e ktheve në teatër babalesh,” shkruan Balla.
