Opozita akuzoi kreun e grupit parlamentar të Partisë Socialiste Taulant Balla se ishte mburoja politike për sjelljen në Shqipëri të mbi 3.4 milionë eurove para të pista ndërsa Balla iu përgjigj duke akuzuar kreun e opozitës Lulzim Basha si të lidhur me krimin.
Policia shqiptare po heton “për zbardhjen e plotë të rrethanave të ngjarjes dhe zbulimin e personave të tjerë të implikuar” në kapjen e një sasie rekord parash të pista të dielën në Portin e Durrësit, por ndërkohë, palët politike kanë shtuar akuzat ndaj njëra-tjetrës në lidhje me këtë ngjarje.
Policia kapi 3.4 milionë euro të dielën gjatë një praktike importimi makinash, të fshehura në dy makina modeste Toyota Yaris. Por tre ditë para se të ndodhte ngjarja, kryetari i Partisë Demokratike Lulzim Basha akuzoi në Kuvend kreun e grupit parlamentar socialist Taulant Balla për “një Toyota Yaris me 1.5 milionë euro”. Pas kapjes së eurove të dielën, Basha akuzoi sërish Ballën duke thënë se paratë i përkisnin “një grupi kriminal nga Elbasani”.
Balla nga ana e tij iu përgjigj, fillimisht duke deklaruar se do të bënte kallëzim penal ndaj Bashës dhe më pas, duke akuzuar Bashën se ka lidhje me grupin kriminal të cilit iu kapën paratë, duke paralajmëruar se “do të nxjerrë fakte të reja” të enjten, kur pritet të ketë seancë plenare.
“Në fund të kësaj historie Basha i ka ca lidhje me personat e përfshirë në këtë çështje. I kam gjetur disa lidhje të Bashës me këtë grup kriminal”, tha Balla para gazetarëve të martën.
“Unë do t’i ruaj për të enjten në seancë plenare disa surpriza për Bashën. Kam qeshur në seancë plenare dhe dje me këtë budalla, që këput një budallallëk dhe mbi të krijon histori”, tha Balla. Ai aludoi gjithashtu se Basha mund ta ketë marrë informacionin mbi operatorin nga “ndonjë militant i mbetur” në strukturat ligjzbatuese të vendit.
I kontaktuar nga BIRN, Balla argumentoi vonesën e kallëzimit të tij penal me procedurat juridike, dhe se kallëzimi do të depozitohet të mërkurën në Prokurorinë e Tiranës.
“Do të jenë dy akuza ndaj kryetarit të Partisë Demokratike, i cili në gjykimin tim ka konsumuar veprën penale të shpifjes dhe dekonspirimit të informacionit policor. Për shkak të teknikaliteve të jurisprudencës avokatët po merren me këtë çështje dhe nesër në mesditë kallëzimi im do të jetë depozituar”, tha ai.
Fakti që Basha dinte aq shumë detaje për një operacion policor që u zhvillua të dielën dhe që i publikoi këto detaje tre ditë më herët në kuvend ka ngritur pikëpyetje mbi dekonspirimin e mundshëm të operacionit nga brenda policisë. Vetë Basha deklaroi se e kreu denoncimin për shkak se policia shqiptare ka qenë “nën presionin e një prej vendeve partnere” për sekuestrimin e parave.
Policia pranoi faktin se lajmi ishte dhënë nga Basha në kuvend në deklaratën e saj të vetme për shtyp, por deklaroi se informacioni i kishte ardhur “nga burimet e saj vendase”. Basha përsëriti akuzën se një pjesë e industrisë së ndërtimit në vend po financohet nga paratë e krimit.
Të kontaktuar nga BIRN, prokuroria e Rrethit të Durrësit nuk iu përgjigj pyetjeve në lidhje me nisjen e hetimeve për zbardhjen e fakteve në dekonspirimin e operacionit në arrestimin dhe zbulimin e personave që fshihen pas transferimit në mënyrë të jashtëligjshme të 3.4 milionë euro.
Edhe policia e Shtetit nuk iu përgjigj pyetjeve BIRN pati mbi pasojat e dekonspirimit të këtij operacioni, që së paku sipas deklaratës zyrtare, dy prej personave të implikuar në këtë grup kriminal nuk janë arrestuar ende.
Partia Demokratike ka denoncuar një listë të gjatë zyrtarësh socialistë për atë që ajo i quan “lidhje me drogën dhe me krimin”.
.