Një gjykatë në Maqedoni në një vendim të shkallës së parë të enjten dha dënime të gjata me burg për shtatë burra të cilët sulmuan rëndë deputetin Ziadin Sela kur një turmë njerëzish hyri me dhunë në parlament në prill 2017.
Gjykata Penale e Shkupit të enjten dha dënime të rënda me burg për shtatë burra për një tentativë vrasje të paramenduar të Ziadin Selës, një deputet dhe lider i aleancës së vogël opozitare për shqiptarët.
Nikola Vojminovski mori dënimin më të madh me 13 vjet e gjashtë muaj burg. Kire Georgievski dhe Aleksandar Janevski-Tosta u dënuan me nga 13 vjet burg secili. Andrej Micov, Nikolce Dimitrievski, Oliver Oshavkovski dhe Kosta Delov u dënuan me nga dhjetë vjet e gjashtë muaj burg secili.
“Të akuzuarit u përpoqën t’i merrnin jetën deputetit Ziadin Sela,” tha gjyqtari gjatë leximit të vendimit, duke e përshkruar rolin e secilit prej tyre gjatë rrahjes së ligjvënësit.
Mbrojtja, e cila pretendoi se të pandehurit nuk ishin fajtorë dhe se provat nuk tregonin paramendim, mund ta apelojnë vendimin e shkallës së parë para një gjykate më të lartë.
Gjyqi në këtë rast të profilit të lartë filloi në janar të këtij viti.
Dhjetë vetë fillimisht u akuzuan për vrasje me paramendim, por prokuroria më vonë tërhoqi akuzat kundër Saso Senkov, duke cituar mungesën e provave.
Prokuroria gjithashtu ndryshoi akuzat kundër dy të pandehurve të tjerë, nga tentativë vrasje në dhunë, pas së cilës ata pranuan fajësinë dhe morën dënime më të lehta, me një vit e dy muaj dhe tre vjet burg.
Sela u lëndua rëndë gjatë sulmit më 27 prill në parlament nga përkrahës të ish-partisë qeverisëse VMRO DPMNE dhe kaloi dhjetë ditë në spital.
Problemet filluan pasi një shumicë prej 67 deputetësh në parlamentin me 120 vende zgjodhi një kryetar të ri, Talat Xhaferi, i cili ishte hapi i radhës drejt formimit të një qeverie të re socialdemokrate, duke shënuar fundin e 11 viteve të VMRO DPMNE në pushtet.
Rreth 100 vetë, përfshirë gazetarë, deputetë, si edhe kryeministri aktual Zoran Zaev, u plagosën gjatë dhunës.
Pavarësisht pretendimeve nga VMRO DPMNE se dhuna ishte spontane, Prokuroria e Krimit të Organizuar në nëntor ngriti akuza për terrorizëm kundër më shumë se 20 vetëve, përfshirë gjashtë deputetë të VMRO DPMNE-së, ish-ministrin e Brendshëm Mitko Cavkov dhe punonjës të tjerë shtetërorë ose organizatorë të protestës.