Perspektivat e Malit të Zi për t’iu bashkuar Bashkimit Europian dhe emigracioni i paligjshëm priten të diskutohen në takimin e parë të Dusko Markoviç si kryeministër me kancelaren gjermane Angela Merkel në Berlin.
Kryeministri malazez Dusko Markoviç do të pritet të premten në Berlin nga kancelarja gjermane Angela Merkel në vizitën e tij të parë zyrtare në Gjermani që kur mori postin në vitin 2016, me kërkesën e Podgoricës për t’iu bashkuar BE-së që pritet të diskutohet gjatë takimit.
Edhe pse qeveria ende nuk e ka konfirmuar programin e vizitës, të dy zyrtarët pritet gjithashtu të diskutojnë se si vendi i vogël i Adriatikut po trajton çështjen e emigracionit pasi disa vende anëtare të BE-së kërkuan “mbylljen” e të ashtuquajturës “rruga ballkanike” për emigrantët dhe refugjatët.
Në një njoftim të shkurtër për shtyp, zyra e Markoviçit tha se vizita e tij në Gjermani do të jetë një mundësi për një “shkëmbim të pikëpamjeve” me Merkelin lidhur me marrëdhëniet dypalëshe dhe lidhjet ekonomike mes dy vendeve brenda kuadrit të Procesit të Berlinit, si dhe integrimin europian të Mali i Zi.
Procesi i Berlinit u iniciua nga Gjermania në vitin 2014 për të përmirësuar marrëdhëniet brenda rajonit të Ballkanit dhe për të përshpejtuar integrimin në BE të atyre shteteve që nuk janë ende anëtare.
Fokusi është në ato vende të Ballkanit që ende nuk janë anëtarë të BE-së – Shqipëria, Bosnja dhe Hercegovina, Kosova, Maqedonia, Mali i Zi dhe Serbia.
Vizita vjen pasi kancelarja gjermane mbajti anën e Malit të Zi në një mosmarrëveshje me presidentin e SHBA-ve Donald Trump, i cili tha se anëtarësimi i vendit të vogël të Ballkanit në NATO do të thotë se “njerëzit shumë agresivë të Malit të Zi” mund të fillojnë Luftën e III Botërore për shkak të paktit të përbashkët të mbrojtjes të Aleancës.
Intervista u zhvillua pasi Trump takoi presidentin rus Vladimir Putin.
Më 20 korrik Merkel tha se klauzola kolektive e NATO-s vlen për të gjithë anëtarët, jo vetëm për vendet e mëdha.
Ajo shtoi se Mali i Zi, një ish-republikë jugosllave, bëri përpjekje të mëdha për t’u bashkuar me NATO dhe shtoi: “Unë jam e kënaqur që Mali i Zi është anëtar.”
Markoviç është kryeministri i dytë malazez që ftohet të vizitojë zyrtarisht Berlinin pasi vendi fitoi pavarësinë në vitin 2006.
Igor Lukiç, kryeministri i Malit të Zi nga viti 2010-2012, u ftua të takohej me Merkelin në Berlin vetëm një muaj pasi qeveria e tij u miratua nga parlamenti malazez.
Por lideri veteran i Malit të Zi, Milo Djukanoviç, shtatë herë kryeministër dhe aktualisht në mandatin e tij të dytë si president i vendit, nuk është ftuar kurrë të takohet me Merkelin në Berlin, as ajo nuk e ka vizituar Malin e Zi.
Kritikët e qeverisë thanë se hezitimi i dukshëm i Merkelit për të takuar Djukanoviçin në Berlin tregonte se Gjermania nuk ishte e kënaqur me gjendjen e demokracisë dhe sundimit të ligjit në Mal të Zi.
Në maj të vitit 2015, kryeministri i atëhershëm Djukanoviç vizitoi Berlinin dhe mediat lokale pro-qeveritare pohuan se ishte me ftesë të Merkelit, por dy krerët nuk u takuan.
Ai ishte i ftuar në Komitetin e Bundestagut për Çështjet Europiane dhe takoi vetëm ministrin e jashtëm gjerman Frank-Walter Steinmeier.
“Jo ndryshim kufijsh”, thotë Merkel
Kancelarja gjermane Angela Merkel tha të hënën se “nuk do të ketë ndryshime në kufijtë në Ballkanin Perëndimor”.
Një shkëmbim i mundshëm i territorit midis Serbisë dhe Kosovës është diskutuar nga mediat ballkanike dhe ndërkombëtare gjatë dy javëve të fundit, pasi udhëheqësit e të dy vendeve kanë pranuar se “korrigjimet kufitare” ishin në tryezë.
Merkel tha se ndryshimi i kufijve nuk mund të funksionojë, ndërsa duke theksuar përsëri shpresën e anëtarësimit në BE të vendeve që mbetetn ende për t’iu bashkuar.
“Perspektiva europiane për të gjitha vendet e Ballkanit Perëndimor ekziston ende,” tha ajo.
