Pas shembjes së urës në Itali, autoritetet në disa vende të Ballkanit kanë filluar të kontrollojnë sigurinë e disa infrastrukturave të tyre të transportit.
Shembja e një ure në qytetin italian të Xhenovës, ku mbetën 39 të vdekur të martën, ka rritur shqetësime në disa vende të Ballkanit mbi gjendjen e infrastrukturës së tyre të transportit.
Administrata rumune e rrugëve, CNAIR, tha të enjten se “asnjë prej 4,250 urave rumune nuk është në prag të shembjes”, pas një valë shqetësimi nga analistët dhe qytetarët në rrjetet sociale pas tragjedisë në Xhenova.
“Asnjë nga këto ura nuk paraqet ndonjë rrezik për shembje,” tha administrata në një deklaratë për shtyp.
Një raport i Forumit Ekonomik Botëror në vitin 2017 e renditi Rumaninë të 120-tën nga 137 shtete në aspektin e infrastrukturës rrugore.
Kryeministri bullgar Boiko Borissov urdhëroi të mërkurën administratën e tij që të kryejë riparime të urave në të gjithë vendin dhe për të gjejë zgjidhje të reja për të rregulluar ura të vjetëruara dhe të rrezikshme më shumë se një në të njëjtën kohë.
Bullgaria po trajton gjithashtu problemet me infrastrukturën e vjetëruar të transportit. Në shkurt 2017, një dritë në tunelin Echemishka në Bullgarinë veriore ra mbi një makinë dhe vrau një grua 64-vjeçare.
Aksidenti bëri që qeveria të urdhërojë një inspektim, i cili përcaktoi se 16 nga 34 tunelet e kontrolluar nga Agjencia e Infrastrukturës Rrugore të Bullgarisë përbënin një rrezik të moderuar dhe të lartë aksidentesh.
Ndërkohë në Bosnje dhe Hercegovinë, Osman Lindov, një profesor në Fakultetin e Transportit në Sarajevë, tha të mërkurën se strukturat më shumë se 40 vjeçare në vend paraqesin një rrezik sigurie.
“Ka ura, tunele dhe rrugëdalje në rrjetin rrugor kryesor që përbëjnë rrezik,” tha Lindov për kanalin televiziv rajonal N1.
Ndihmës ministri i ndërtimit i Kroacisë Zeljko Uhlir tha për N1 se mirëmbajtja e infrastrukturës së urës së Kroacisë është e rregullt dhe e një standardi të lartë.
Megjithatë, ai pranoi se ka disa probleme, duke veçuar Urën e Lirisë në kryeqytetin Zagreb, e cila është ndërtuar në vitin 1950. Ura është e njohur për blloqet e betonit që bien herë pas here prej saj.
Në Serbi, Ministrja e Ndërtimit, Trafikut dhe Infrastrukturës Zorana Mihajloviç urdhëroi inspektimin e të gjitha urave më të gjata se 100 metra.
“Inspektimi do të kontrollojë jo vetëm dokumentet e nevojshme, por gjithashtu edhe mënyrën si janë ndërtuar urat,” tha ministria.
Krerët e vendeve të Ballkanit i kanë shprehur ngushëllime Italisë për aksidentin në Xhenova, siç kanë bërë edhe autoritetet e Moldavisë, dy nga qytetarët e të cilëve ishin ndër viktimat e urës.
Një 44 vjeçar nga Taraclia në Moldavi u gjet i vdekur dhe një 34 vjeçar pësoi plagë në kokë dhe do t’i nënshtrohet një ndërhyrje kirurgjikale, sipas autoriteteve moldave.
