Partitë pro-serbe në Mal të Zi kanë lajmëruar nisjen e një peticioni duke kërkuar që qeveria të anulojë njohjen e saj të pavarësisë së Kosovës.
Fronti Demokratik dhe Këshilli Kombëtar Serb, që përfaqësojnë komunitetin serb në Malin e Zi, të hënën thanë se do të nisin një peticion për të anuluar vendimin e Malit të Zi për të njohur pavarësinë e Kosovës.
“Të paktën 85 për qind e shtetasve malazezë nuk e mbështesin njohjen false të shtetit të Kosovës,” tha një deklaratë për shtyp nga Partia e Popullit Demokratik, një nga anëtarët e grupit më të madh të opozitës të Malit të Zi, Fronti Demokratik, anëtarët e të cilit vizituan qytetin me shumicë serbe të Mitrovicës së veriut në Kosovë gjatë fundjavës.
Mbledhja e firmave do të fillojë këtë javë, shtoi partia.
Mali i Zi njohu pavarësinë e Kosovës në vitin 2008, pavarësisht zemërimit të Serbisë dhe të komunitetit të madh serb në Malin e Zi.
Kjo nuk është hera e parë që opozita malazeze ka bërë thirrje për tërheqjen e njohjes së Kosovës.
Në maj 2017, kreu i Frontit Demokratik pro-rus, Nebojsa Medojeviç, i bëri thirrje qeverisë që të mbrojë kufirin me Kosovën dhe të tërheqë njohjen e pavarësisë së Kosovës – pasi Kosova përsëri vonoi një votim në parlamentin e vet mbi marrëveshjen e ndarjes së kufirit.
Serbia ende pretendon se Kosova është një provincë e Serbisë edhe pse dy vendet kanë rënë dakord “të normalizojnë” marrëdhëniet në interes të integrimit në BE.
