Gjatë vizitës së tij dy ditore në Kosovë, presidenti serb Aleksandër Vuçiç mohoi që dy vendet të jenë pranë ndonjë zgjidhjeje për mosmarrëveshjen e tyre dhe nuk u lejua të vizitonte një fshat me shumicë serbe.
“A kemi ndonjë projekt-zgjidhje në Bruksel? Nuk kemi. Madje, as që jemi afër një zgjidhjeje,” tha presidenti Aleksandër Vuçiç në një fjalim para mijëra serbëve në gjysmën veriore të Mitrovicës të dielën.
Pasi veteranët e luftës të Kosovës bllokuan rrugët që të çojnë në fshatin Banjë, në jug të lumit Ibër, qeveria e Kosovës anuloi vizitën e Vuçiçit në fshat, por nuk pati probleme për mbajtjen e një mitingu nga ana e tij në Mitrovicën e veriut.
Vuçiç theksoi se ideja e tij ishte të mbante paqen dhe të përpiqej të “ndërtonte ura drejt shqiptarëve”. Ai shtoi se serbët duhet “të përpiqen për një marrëveshje me shqiptarët e Kosovës, edhe kur ne e dimë se është pothuajse e pamundur, sepse gjithçka tjetër na çon drejt një humnere dhe një katastrofe”.
Vizita e Vuçiçit në Kosovë pasoi takimet e ndërmjetësuara nga BE-ja në Bruksel, ku Vuçiç vendosi të mos takonte homologun e tij të Kosovës, Hashim Thaçi.
Ish-provinca shpalli pavarësinë nga Serbia në vitin 2008. Serbia kurrë nuk e ka njohur atë.
Megjithatë, presioni ndërkombëtar po rritet në të dy vendet që këto të fundit të zgjidhin mosmarrëveshjen e gjatë dhjetëvjeçare, nëse ata duan të sigurojnë anëtarësimin në BE.
Vuçiç e nisi udhëtimin e tij në Kosovë duke vizituar të shtunën liqenin e Ujmanit, ku ai deklaroi se është koha që serbët dhe shqiptarët të përpiqen të flasin me më shumë respekt për njëri-tjetrin.
Vuçiç të dielën planifikoi një vizitë në fshatin Banjë, në jug të lumit Ibër, por 200 veteranë të luftës të Kosovës të cilët ishin kundër vizitës në fshatin me shumicë serbe ngritën barrikada në hyrje të fshatit.
Qeveria e Kosovës vendosi më pas të anulojë vizitën në Banjë për shkak “të arsyeve të sigurisë”.
Presidenti Thaçi i kritikoi protestat, duke thënë se ato nuk kontribuojnë për paqen dhe stabilitetin në rajon.
Por ai tha se si president i Kosovës, ai e kuptonte reagimin.
“Kjo tregon se plagët e dhembjes dhe luftës janë ende të freskëta,” shkroi Thaçi në Facebook.
Kryetari i parlamentit të Kosovës dhe kreu i Partisë Demokratike të Kosovës, PDK, Kadri Veseli, tha se ai kishte qenë kundër vizitës së Vuçiçit në liqenin e Ujmanit, por shtoi se kjo ishte e lejuar pas këmbënguljes së partnerëve ndërkombëtarë të Kosovës.
“Megjithatë, mendoj se është mirë që vizita e tij Vuçiçit u realizuar sepse edhe një herë tjetër është vërtetuar se liderët e Serbisë po vazhdojnë traditën e ish-liderit serb Sllobodan Millosheviç,” shkroi Veseli në Facebook.
Bekim Jashari, kryetari i Komunës së Skënderajt dhe nipi i komandantit të UÇK-së, Adem Jashari, i cili u vra bashkë me 59 anëtarë të familjes së tij të madhe nga forcat serbe në Prekaz në vitin 1998, mori pjesë në protestë.
“Ne kemi më shumë se 15,000 të vrarë gjatë luftës në Kosovë, ndërsa 1,648 ende rezultojnë të zhdukur,”tha Jashari për mediat.
“Është e pafalshme që presidenti serb të kalojë përmes Drenicës pa asnjë ndjesë apo të sillet si të mos ketë ndodhur asgjë,” tha Jashari.
Por kreu i delegacionit të BE-së në Serbi, Sem Fabrizi, tha për agjencinë e lajmeve FoNet se BE-së “i vjen keq për anulimin e vizitës së Vuçiçit në Banjë” dhe shtoi se nevojitej përkushtim për ruajtjen e paqes dhe sigurisë nga të dyja palët.
Kryeministrja e Serbisë, Ana Brnabiç, tha në reagimin e saj se incidentet “tregojnë gjithë kompleksitetin e situatës në Kosovë”, duke i akuzuar shqiptarët e Kosovës për mos respektim të marrëveshjeve që janë rënë dakord.
