Rumunët muajin që vjen do të votojnë për një përkufizim të asaj që përbën një familje, pasi parlamenti miratoi një projektligj që lejon mbajtjen e një referendumi mbi ndryshimin apo jo të kushtetutës për ndalimin e martesave të të njëjtit seks.
Rumunët do të votojnë në një referendum muajin e ardhshëm nëse ata duan të ndryshojnë kushtetutën e tyre në mënyrë që të ndalojnë martesën e të njëjtit seks duke e përcaktuar një familje si një “bashkim konsensual midis një burri dhe një gruaje”.
Senati i vendit miratoi të martën një projektligj, tre vjet pasi Koalicioni për Familjen, një organizatë e përbërë nga OJQ fetare dhe të mbështetura nga kisha, arriti të mbledhë tre milion nënshkrimet e nevojshme për ta paraqitur legjislacionin e propozuar për referendumin në parlament. Vetëm 13 senatorë votuan kundër tij.
Dhoma e ulët e parlamentit e miratoi projektligjin në maj të vitit 2017. Ai duhet të shpallet gjithashtu dekret nga presidenti dhe qeverisë i kërkohet të organizojë një plebishit brenda një muaji nga publikimi i tij në Fletoren Zyrtare të vendit.
Përcaktimi i përkufizimit të familjes në kushtetutën që aktualisht e përshkruan martesën si “një bashkim midis bashkëshortëve” ka qenë një nga temat kryesore të debatuara nga shoqëria civile dhe politikanët rumunë gjatë viteve të fundit.
Partitë kryesore politike, si Social Demokratët në pushtet dhe Liberalët, kanë njoftuar në disa raste se ata do ta mbështesin projektligjin në parlament.
Kreu i Social Demokratëve Liviu Dragnea njoftoi në fillim të shtatorit pas një takimi të lidershipit të partisë së tij se ata po mendonin 7 tetorin si datën e referendumit.
“Ne votuam në Komitetin Ekzekutiv dhe vendosëm ta mbështesim këtë nismë,” tha Dragnea për mediat më 1 shtator.
Kreu i liberalëve, Ludovic Orban, tha më 2 shtator se pavarësisht faktit se partia e tij mbështet referendumin, ai do të lejonte anëtarët e tjerë të partisë së tij të votonin “siç u thotë ndërgjegjja”.
I vetmi fraksion politik që e ka pozicionuar veten kundër referendumit ishte Bashkimi Shpëtoni Rumaninë, deputetët e të cilit votuan kundër projektligjit si në Senat ashtu edhe në Dhomën e Deputetëve.
Koalicioni për Familjen tashmë ka nisur fushatën për referendumin, duke publikuar një sërë videosh ku shfaqen adoleshentë dhe të rinj duke folur në mbështetje të “familjes tradicionale”.
Në qershor, Gjykata Europiane e Drejtësisë vendosi se çiftet e martuara të të njëjtit seks kanë të njëjtat të drejta sipas legjislacionit të BE-së për lirinë e qëndrimit si çiftet e martuara heteroseksuale, edhe nëse martesa e të njëjtit seks nuk lejohet në vend.
Çështja u paraqit nga një rumun, Adrian Coman, dhe bashkëshorti i tij amerikan, Robert Hamilton, që u martuan në Belgjikë në vitin 2010.
Autoritetet rumune refuzuan të jepnin dokumentet e nevojshme për të bërë të mundur që Hamilton të punonte dhe të qëndronte përgjithmonë në Rumani me bashkëshortin e tij, pasi ai nuk mund të klasifikohej në Rumani si bashkëshorti i një shtetasi të BE-së.
Mbështetësit e komunitetit LGBT u mblodhën të martën në mbrëmje në Bukureshtin qendror për të protestuar kundër vendimit të Senatit rumun.
Organizata për të drejtat e LGBT MozaiQ i dërgoi një letër të hapur senatorëve rumunë të hënën duke u kërkuar atyre të mos e miratonin projektligjin.
“Referendumet shpesh janë rrugë të shkurtra për çështje të vështira sociale dhe mund të çojnë në gërryerjen e mëtejshme të demokracisë,” tha letra.
