Pasi një gazetar investigativ, Dimitar Varbanov, u sulmua nga subjekte të investigimit të tij, kryeministri bullgar Boyko Borissov në Nju Jork e ka quajtur sulmin “të patolerueshëm” dhe ka kërkuar një hetim të shpejtë.
Gazetari investigativ bullgar Dimitar Varbanov nga programi televiziv “Gospodari na Efira” ose “Zotët e rrugëve ajrore”, i cili përzien përmbajtjen satirike dhe komike me investigime, u sulmua ndërsa ishte në punë në qytetin e Veliko Tarnovos, njoftoi Nova TV të mërkurën në mbrëmje.
Varbanov u hodh në tokë nga pronarët e një depoje ndërsa hetonte një biznes që dyshohet se ripaketonte ushqime të skaduara. Ai u dërgua në spital në qytet, por nuk ka raportuar lëndime serioze, njoftoi Nova TV.
Sulmi tërhoqi reagime nga shoqatat e medias dhe madje edhe nga kryeministri, i cili e dënoi atë nga selia e Kombeve të Bashkuara në Nju Jork.
“I kam dhënë investigimit një orë e gjysmë kohë të më raportojë personalisht se kush është marrë në paraburgim. Kriminelët duhet të ndëshkohen me të gjithë forcën e ligjit,” tha Boyko Borissov në Nju Jork.
“Kjo është e palejueshme,” shtoi Borissov, duke këmbëngulur se sulmet kundër gazetarëve nuk do të toleroheshin.
Shoqata e Gazetarëve Europianë në Bullgari, AEJ, gjithashtu e dënoi sulmin.
Ajo vuri në dukje se institucionet zyrtare, duke përfshirë Autoritetin e Inspektimit të Ushqimit dhe Policinë e Krimit Ekonomik, ishin njoftuar nga Varbanov për parregullsitë që po ndodhnin në depo që nga qershori. Megjithatë, nuk është marrë asnjë masë.
“Po bëhet gjithnjë e më e qartë se dështimi i institucioneve për të luftuar krimin e organizuar dhe korrupsionin po bëhet një kërcënim për gazetarët që hetojnë raste të tilla,” thuhet në deklaratën e AEJ.
Vitin e kaluar, Varbanov u kërcënua për një tjetër investigim me të cilin ai po punonte dhe në vitin 2010 ai u godit me një çekiç ndërsa bënte punën e tij.
Më herët në shtator, dy gazetarë investigativ, Atila Biro nga projekti rumun Rise dhe Dimitar Stoyanov i Bivol, u arrestuan nga policia bullgare në periferi të Pernikut, pranë Sofjes, ndërsa përpiqeshin të xhironin djegien e dokumenteve që dyshohet se kishin lidhje me keqpërdorimin e fondeve të BE-së.
Bullgaria renditet e 111-ta, renditja më e ulët e të gjitha vendeve të BE-së, në indeksin e lirisë së shtypit të Reporterëve pa Kufij.
