Këshilli i Lartë i Drejtësisë votoi jashtë rendit të ditës pro kërkesës së anëtarit të saj, Gjin Gjoni për të marrë leje prindërore 2-vjeçare, vendim i cili u denoncua nga ministrja e Drejtësisë, Etilda Gjoni si i paligjshëm dhe i motivuar nga procesi i vetingut.
Gjin Gjoni, gjyqtar i Apelit të Tiranës ka siguruar një leje prindërore 2-vjeçare në mbledhjen e fundit të Këshillit të Lartë të Drejtësisë-vendim i denoncuar si i paligjshëm nga ministrja e Drejtësisë, Etilda Gjonaj.
Kërkesa për leje 2-vjeçare është futur në mënyrë të beftë në rendin e ditës së 11 tetorit, ku anëtarët e KLD-së, mes të cilëve edhe gjyqtari Gjoni, ishin mbledhur për të zëvendësuar Entela Priftin, e cila dështoi të kalonte procesin e vetingut.
Sipas procesverbalit të publikuar në faqen e KLD-së, kërkesa për leje prindërore 2-vjeçare është hedhur për diskutim nga gjyqtari Gerd Hoxha dhe është miratuar pa debate brenda pak minutash. Gjyqtari Gjin Gjoni, i cili është njëherazi edhe anëtar në KLD nuk rezulton sipas procesverbalit ta ketë përjashtuar veten nga vendimarrja.
Kërkesa është lexuar në kohën kur në mbledhjen e KLD-së mungonte kuorumi dhe për votimin e saj, është telefonuar dhe është pritur rikthimi në sallë i anëtares Eneida Civici.
“Në kërkesën e tij, zotëria parashtron se është bërë me vajzë. Vajza ka shtetësi gjermane. Së bashku me bashkëshorten janë rezidentë në Gjermani dhe qëndrimi jashtë këtij vendi të Bashkimit Europian (Shqipëri) më shumë se tre muaj nuk lejohet,” argumentoi gjyqtari Hoxha.
“Të gjitha vizitat dhe kontrollet periodike do të bëhen në shtetin gjerman për një periudhë 2-vjeçare, çka janë të shpeshta dhe do të kërkojnë angazhimin, shkëputjen time të herëpashershme nga puna, e do të krijonte probleme në vazhdimësinë e gjykimeve dhe zvarritjen e dosjeve…,” vazhdoi më tej Hoxha, duke lexuar kërkesën e gjyqtarit Gjin Gjoni.
Ministrja e Drejtësisë, Etilda Gjonaj tha të shtunën në një deklaratë për mediat se ishte vënë në dijeni të vendimit vetëm pas zbardhjes së procesverbalit të mbledhjes, ndërsa evidentoi se çështja është futur në axhendë në kundërshtim me legjislacionin dhe rregullat proceduriale të KLD-së.
Ajo shtoi se kërkesa është votuar si kurrë më parë në historinë e KLD-së edhe nga vetë zoti Gjoni, ndërsa e ligj këtë me procesin e vetingut.
“Është e qartë se nuk është objekti i kërkesës, por vetëm vetingu i padëshiruar që e ka çuar anëtarin e KLD-së deri në këtë absurd,” tha ministrja Gjonaj.
Ministrja e Drejtësisë paralajmëroi se do të kërkojë shfuqizimin e vendimit “absolutisht të pavlefshëm” në KLD, ose në të kundërt do t’i drejtohet gjykatës dhe Komisionit të vetingut.
Në një prononcim për Balkanweb, gjyqtari Gjin Gjoni e cilësoi deklaratën e ministres së Drejtësisë si nonsens dhe të pabazë.
“Kuorumi për vendimarrjen ka qenë i plotë dhe nuk është e vërtetë që votova për veten time,” tha Gjoni, i cili shtoi se leja prindërore nuk e përjashton dhe nuk e shtyn vetingun.
