Policia maqedonase po i ofron mbrojtje deputetëve që morën kërcënime pasi votuan pro për vënien në zbatim të marrëveshjes historike të emrit me Greqinë, tha ministri i brendshëm.
Ministri i Brendshëm Oliver Spasovski tha të hënën se të 80 deputetët vota e të cilëve ishte kyçe për nisjen e ndryshimeve kushtetuese për të siguruar marrëveshjen e Maqedonisë me Greqinë, po marrin 24 orë mbrojtje policore.
Spasovski tha se deputetët që votuan “po” për marrëveshjen kanë nevojë për mbrojtje pasi po marrin mesazhe kërcënuese në rrjetet sociale që i akuzojnë ata për tradhti dhe ryshfet.
“Ne nuk do të lejojmë një sjellje të tillë dhe kushdo që ngjall frikë midis qytetarëve apo ligjvënësve, do të sanksionohet,” tha Spasovski në një konferencë për shtyp.
Ndër ata që votuan pro marrëveshjes janë edhe tetë ligjvënës nga blloku i opozitës, të cilët mbështetën ndryshimet pavarësisht nga direktivat e partisë kryesore të opozitës VMRO DPMNE.
Më herët gjatë ditës, ministria e brendshme tha se do të ngrejë padi penale kundër një 38-vjeçari nga zona e Shkupit i cili kërcënoi deputetët në Facebook. I dyshuari tashmë është thirrur për t’u marrë në pyetje, shtoi ministria.
Spasovski tha se policia ka identifikuar një “grup” të afërt me lëvizjen joformale që bëri fushatë për një bojkot të referendumit të 30 shtatorit, i cili ai tha se ka kërcënuar jetën e deputetëve dhe familjeve të tyre. Ai tha se policia po monitoron nga afër aktivitetet e grupit.
Të premten në mbrëmje vonë, pas një dite tensionesh të larta dhe pasigurie, qeveria e kryeministrit Zoran Zaev kaloi një test kyç kur 80 ligjvënës votuan në favor dhe 39 kundër mocionit të saj për të filluar procedurën për të ndryshuar kushtetutën për të lejuar që emri i vendit të ndryshohet në Republika e Maqedonisë së Veriut – siç kërkohet sipas marrëveshjes së arritur me Greqinë këtë verë.
Menjëherë pas votimit, tetë deputetë nga blloku i opozitës, të cilët votuan në favor, u kritikuan dhe kërcënuan në rrjetet sociale dhe në disa media pro-opozitare.
Të premten në mbrëmje, faqja e lajmeve pro-opozitare Republika botoi një artikull me titullin “Mbajini mend këto fytyra, këta janë tradhtarë maqedonas” me fotografitë dhe emrat e deputetëve të opozitës, me pretekst se ajo thjesht po përcjell reagimet e njerëzve në rrjetet sociale.
Të njëjtën natë, VMRO DPMNE përjashtoi nga partia shtatë nga deputetët e saj që votuan në favor, duke shprehur dyshime se ata kishin marrë ryshfet ose u ishte bërë presion, gjë të cilën qeveria e ka mohuar.
Deputeti i tetë i opozitës që votoi në favor të marrëveshjes ishte nga aleati më i vogël i VMRO DPMNE-së, Partia Socialiste.
