Ndërsa Kuvendi i Shqipërisë votoi mbylljen e të gjitha dyqaneve të basteve, deputetët e Partisë Socialiste në pushtet deklaruan se kanë marrë mesazhe kërcënuese nga njerëz që kundërshtojnë mbylljen.
Kryeministri Edi Rama tha se deputetët e tij kanë marrë kërcënime anonime me mesazhe telefonike ndërsa në Kuvendin e Shqipërisë u votua të enjten ligji që mbyll pothuajse të gjithë industrinë e bixhozit në vend.
Duke folur në parlament, Rama deklaroi se shumica e kompanive që veprojnë në këtë sektor janë nën pronësinë e njerëzve me të shkuar kriminale ndërsa falënderoi deputetët e tij për votimin e mbylljes pavarësisht “një periudhe stresi me mesazhe shqetësuese të të gjitha llojeve”.
“Për ata që kanë orkestruar apo urdhëruar këto mesazhe, brenda apo jashtë burgjeve, ne po japim përgjigjen tonë duke votuar tani mbylljen përfundimtare të bixhozit,” tha Rama.
Kreu u komisionit parlamentar të Ekonomisë Erion Braçe lexoi në parlament që mesazh që ai tha se ka marrë: “Ti po merresh me ne, ne do të merremi me fëmijët e tu.”
Sipas Ramës, mes pronarëve të kompanive të basteve ka të dënuar për vrasje, plagosje, organizim të paligjshëm të lojërave të fatit dhe një sërë precedentësh të tjerë penalë.
Prania e personave me të shkuar apo të tashme kriminale në këtë fushë nuk është gjë e panjohur dhe po kështu është fakti që ligji aktual për lojërat e fatit ndalon në mënyrë eksplicite licencimin e kompanive që kanë aksionerë apo drejtues të dënuar apo nën hetim për vepra të rënda penale.
Në fjalimin e tij, Rama u përpoq të mbronte historinë e maxhorancës së tij qeverisëse në lidhje me lojërat e fatit, pasi Kuvendi i Shqipërisë dy herë në katër vitet e fundit miratoi favorizime fiskale të shumta për industrinë e lojërave të fatit si dhe shtyu afatin e operimit të lojërave elektronike.
“Është e pavërtetë ajo çfarë është trumbetuar me të madhe se pas zhvillimit të operacionit Fundi i Marrëzisë, marrëzia është zhvilluar ende më… Kjo është e pavërtetë,” tha Rama duke sugjeruar se shtyrja e miratuar edhe përmes votës së tij personale në vitin 2016 ishte “një kompromis i keq” me ish-aleatët e vet qeverisës, pa dhënë shpjegime. Në fakt, projektligji për shtyrjen e afatit të operimit të kazinove elektronike dhe moszbatimit të kriterit të distancave u propozua nga një grup deputetësh, ku shumica i përkisnin Partisë Socialiste
Sipas ligjit të ri, të gjitha dyqanet e basteve do të mbyllen më 1 janar 2019 bashkë me kazinotë elektronike. Rama deklaroi se do të krijojë një grup pune që ai e quajti “skuadër dixhitale” për të mbyllur aksesin nga territori i Republikës së Shqipërisë për kompanitë e huaja që ofrojnë baste sportive apo kazino përmes internetit, ndërsa pranoi se mbyllja është një proces i vështirë për shkak të aftësive të kompanive të basteve për të ndryshuar adresat e internetit.
Shqipëria tentoi të mbyllë aksesin në faqet e basteve edhe në vitin 2014, në kuadër të fushatës “Fundi i Marrëzisë”. Procedura e mbylljes konsiston në urdhërimin e kompanive të ofrimit të internetit nga ana e AKEP që të klasifikojnë në listën e zezë adresat e kompanive të basteve.
Aktualisht një numër faqesh interneti që ofrojnë baste sportive janë të paaksesueshme nga territori i Republikës së Shqipërisë, por jo të gjitha.
Vetëm një kazino që operon aktualisht në Tiranë me një ligj të veçantë do të lejohet të funksionojë bashkë me Lotarinë Kombëtare dhe Telebingon. Rreth 8 mijë vende pune pritet të humben.
Ligji u miratua me 75 vota pro pa vota kundër apo abstenime. Të gjitha votat erdhën nga Partia Socialiste dhe deputetët e afërt me të. Partitë opozitare nuk morën pjesë në seancë, duke vijuar politikën e tyre të bojkotit të padeklaruar.
Shqipëria ka tentuar disa herë në të shkuarën të vendosë nën kontroll industrinë e bixhozit përmes përqendrimit në pak zona ose përmes reduktimit të shtrirjes së tyre territoriale. Gjithsesi këto përpjekje kanë dështuar deri tani, sugjerohet për shkak të ndërhyrjeve nga industria e bixhozit.