Forcat speciale të policisë së Kosovës të premten në mëngjes arrestuan tre persona të dyshuar se kanë lidhje me vrasjen e politikanit serb të Kosovës Oliver Ivanoviç dhe një tjetër për pengim të forcave të policisë.
Një njësi speciale e policisë së Kosovës arrestoi katër vetë në katër vende në Kosovën e veriut të premten në mëngjes, si pjesë e hetimit të vrasjes së politikanit serb të Kosovës Oliver Ivanoviç.
Prokuroria e Kosovës tha se policia bastisi gjithashtu shtëpinë e Milan Radoiciç, nënkryetar i partisë kryesore serbe të Kosovës, Lista Serbe, por ai e shmangu arrestimin.
Radoiciç u cilësua si sundimtari i vërtetë i rajonit më serb të veriut të Kosovës nga Ivanoviçi pak para se ai të qëllohej për vdekje më 16 janar të këtij viti para zyrave të partisë së tij në qytetin verior të Mitrovicës. Radoiciç nuk e ka komentuar pretendimin.
“Ne mund të konfirmojmë se në bazë të një urdhri të gjykatës, policia ka ndërmarrë bastisje në Mitrovicën e veriut lidhur me vazhdimin e hetimeve për vrasjen e O. I.,” tha policia e Kosovës në një deklaratë.
“Njësitë e policisë kanë bastisur katër vende dhe kanë arrestuar katër persona: tre në lidhje me hetimin dhe një që i bëri rezistencë policisë,” thuhet në deklaratë.
Media njoftoi se midis të arrestuarve janë dy oficerë të policisë së Kosovës, Dragisa Markoviç, që ka punuar në këtë rast, dhe Nedeljko Spasojeviç.
Televizioni publik serb RTS njoftoi se policia gjithashtu arrestoi dy burra të quajtur Sasa Djuriq dhe Marko Rasiç.
Zhurma e sirenave zgjoi njerëzit në veri të Mitrovicës rreth orës 6 të mëngjesit të premten në mëngjes gjatë operacionit policor. Gjithashtu u dëgjuan të shtëna me armë zjarri.
Zv/kryetari i Listës Serbe, Igor Simiç, akuzoi policinë e Kosovës se veproi brutalisht gjatë operacionit.
Kryetari serb i Mitrovicës së Veriut, Goran Rakiç, i bëri thirrje forcave të NATO-s në Kosovë që forcat e KFOR-it të vijnë në qytet dhe “t’i shpjegojnë popullit përse ata thanë dje se po mbanin gjithçka nën kontroll dhe se nuk kishte lëvizje të forcave speciale të Kosovës”.
Pasi policia e Kosovës u tërhoq të premten, serbët filluan të mblidheshin në qendër të Mitrovicës së Veriut.
Një tjetër protestë nga serbët nga veriu i Kosovës është planifikuar gjithashtu për të premten për shkak të vendimit të Kosovës për të rritur jashtëzakonisht tarifat e importit për mallrat nga Serbia dhe Bosnja dhe Hercegovina.
Kosova të mërkurën rriti taksat mbi importet serbe dhe boshnjake nga 10 për qind në 100 për qind, pas një rritjeje të mëparshme më 6 nëntor.
Ndërkohë, presidenti serb Aleksandër Vuçiç thirri një takim urgjent me krerët e ushtrisë dhe policisë serbe dhe përfaqësuesit e zyrës së qeverisë serbe për Kosovën.
Vrasja e Ivanoviçit, lideri i një partie serbe të Kosovës të quajtur Liri, Demokraci dhe Drejtësi, u dënua gjerësisht nga zyrtarë të BE-së, Serbisë dhe Kosovës.
Ai shihej si një politikan i moderuar i cili mbështeste bashkëjetesën mes pakicës serbe të Kosovës dhe shumicës shqiptare.
Megjithatë, ai po rigjykohej për urdhërimin e vrasjes së shqiptarëve të Kosovës në vitin 1999 gjatë luftës në vitin 1999. Ai e kishe deklaruar veten të pafajshëm.
