Një raport i ri nga Human Rights Watch akuzoi policinë kroate për abuzim, rrahje dhe zhvatje parash nga emigrantët dhe refugjatët ndërkohë që nuk i lejon ata të kërkojnë azil.
Një raport i Human Rights Watch i publikuar të martën pretendoi se policia kufitare kroate ka kërcënuar, rrahur, ofenduar dhe i ka zhvatur para dhe sende të çmuara emigrantëve dhe refugjatëve, si edhe i ka kthyer ata në Bosnje dhe Hercegovinë.
Kroacia i ka mohuar akuzat kundër policisë, sipas raportit.
Human Rights Watch intervistoi 20 persona, duke përfshirë 11 kryefamiljarë dhe një djalë të pashoqëruar, i cili tha se policia kroate i dëboi ata në Bosnje dhe Hercegovinë pa një proces të rregullt pasi i ndaloi ata në brendësi të territorit kroat.
Gjashtëmbëdhjetë prej tyre, duke përfshirë gra dhe fëmijë, thanë se policia i rrahu me shkopinj gome, i qëlloi me shkelma, u vodhi paratë dhe i vodhi ose shkatërroi celularët, thuhet në raport.
“Kroacia e ka për detyrë të mbrojë azilkërkuesit dhe emigrantët. Në vend të kësaj, policia kroate i rrahu azilkërkuesit dhe i ktheu ata përtej kufirit,” tha Lydia Gall, studiuese e Ballkanit dhe BE-së në Human Rights Watch.
Të 20 të intervistuarit dhanë shpjegime të detajuara se si u ndaluan nga njerëz që ose e identifikuan veten si policë kroatë ose kishin veshur uniforma të ngjashme me ato që mban policia kroate.
Shtatëmbëdhjetë dhanë përshkrime të qëndrueshme të furgonëve të policisë të përdorura për transportimin e tyre në kufi. Një nënë dhe e vajza e saj u transportuan në atë që ato e përshkruan si një makinë policie. Dy vetë thanë se policia kishte qëlluar në ajër dhe pesë thanë se policia kishte vënë maska.
Raporti i Human Rights Watch tha se Ministrit të Brendshëm kroat Davor Bozinoviç iu dha një përshkrim i gjetjeve të hulumtuesve para se ato të publikoheshin dhe se ai i mohoi akuzat.
“Bozinoviç tha se provat e rikthimeve dhe dhunës ishte e pamjaftueshme për të pasur ndjekje penale, se akuzat nuk mund të konfirmoheshin dhe se emigrantët akuzojnë policinë kroate me shpresën se kjo do t’i ndihmojë ata të hyjnë në Kroaci. Ai tha se ministria e tij nuk mbështet asnjë lloj dhune apo intolerance nga oficerët e policisë,” tha raporti.
Agjencia e OKB-së për refugjatë, UNHCR, tha në gusht se kishte marrë raporte se Kroacia kishte kthyer pas 2,500 emigrantë dhe azilkërkues në Serbi dhe Bosnjë që nga fillimi i vitit. Këto deportime ndonjëherë ishin shoqëruar me dhunë dhe vjedhje, pohoi UNHCR.
Në përgjigje të një thirrjeje nga komisioneri i të drejtave të njeriut i Këshillit të Europës për të hetuar këto akuza, kryeministri kroat Andrej Plenkoviç në shtator mohoi çdo keqbërje dhe vuri në pikëpyetje burimet e informacionit.
Policia në Donji Lapac, një vend në kufirin me Bosnjën, nuk pranoi t’i siguronte avokates së popullit të Kroacisë, Lora Vidoviç, qasje në dosjet policore për trajtimin e emigrantëve dhe i tha asaj se policia po vepronte në përputhje me ligjin.
Kroacia ka një marrëveshje dypalëshe ripranimi me Bosnjën që e lejon Kroacinë të kthejë shtetasit e vendeve të treta që nuk kanë leje ligjore për të qëndruar në vend.
Sipas Ministrisë së Sigurisë së Bosnjës, sipas marrëveshjes, Kroacia riktheu në Bosnje 493 persona midis janarit dhe nëntorit të këtij viti.
Asnjë nga personat që Human Rights Watch mori në pyetje nuk iu nënshtrua ndonjë procedure formale rikthimi para se të detyroheshin të kalonin përsëri kufirin.
Në vitin 2018 numri i emigrantëve dhe azilkërkuesve në Bosnjë u rrit nga më pak se 1,000 që ishte në vitin 2017 në afërsisht 22,400, sipas Komisionit Europian.
Komisioni vlerëson se aktualisht në vend ndodhen 6,000 emigrantë dhe azilkërkues.
