Filmi me metrazh të shkurtër “Në mes” është zgjedhur të shfaqet në Festivalin Ndërkombëtar të Filmit Berlinale, i pari në kinematografinë e Kosovës.
Industria e filmit në Kosovë do të debutojë në Festivalin Ndërkombëtar të Filmit Berlinale muajin e ardhshëm me filmin me metrazh të shkurtër “Në Mes”, të përshkruar nga producenti i tij si një vështrim “shumë kosovar” në marrëdhëniet midis vëllezërve dhe çështjes së migracionit.
Filmi, realizimi i të cilit kushtoi 80,000 euro dhe do të marrë pjesë në Filmat me Metrazh të Shkurtër në Berlinale, është i pari nga Kosova që do të shfaqet në festival në vitin e tij 69-të që do të mbahet nga data 7 deri më 16 shkurt.
“Nuk di se si ta përshkruaj këtë ndjenjë,” tha regjisori Samir Karahoda.
“Dua të shpreh mirënjohjen time për secilin prej protagonistëve, pa të cilët ky film nuk do të ishte i mundur dhe një falënderim i veçantë i shkon ekipit i cili ka punuar me përkushtim në krijimin e kësaj vepre arti,” tha ai në një deklaratë për shtyp të lëshuar nga Ministria e Kulturës, Rinisë dhe Sporteve e Kosovës.
Frymëzuar nga projekti i fotografisë Vëllezërit Kosovarë, në të cilin Karahoda punoi në vitin 2011, filmi prej 15 minutash trajton dy tema paralele: fenomenin e vëllezërve kosovarë që ndërtojnë shtëpi identike dhe atë të migracionit, një çështje që ka ndikuar thellë në shoqërinë kosovare.
Karahoda analizon marrëdhënien dhe solidaritetin mes vëllezërve, sakrificën dhe vendosmërinë e prindërve të tyre për të ruajtur harmoninë brenda familjes dhe kuptimin dhe rëndësinë e shtëpisë dhe shpresës.
“Filmi është disi jo-konvencional, që do të thotë se nuk është një nga ata filmat klasik me metrazh të shkurtër,” tha për BIRN producenti Eroll Bilibani.
“Ai është i ngadaltë dhe plot art, shumë i bukur për syrin dhe historia është rajonale, shumë kosovare. Por ka një kontekst universal. Në një film me metrazh të shkurtër trajtohen shumë tema, tema që janë të vështira për t’i trajtuar.”
Ministri i Kulturës, Rinisë dhe Sporteve i Kosovës Kujtim Gashi vuri në dukje mbështetjen e shtetit për filmin nëpërmjet Qendrës Kinematografike të Kosovës dhe tha se ishte “shumë i lumtur me këtë sukses”.
Gashi tha se mbështetja për kinematografinë do të vazhdojë duke marrë parasysh vlerën e filmave të tillë për imazhin e Kosovës jashtë saj.
Në Berlinalen e viti 2019, 24 filma nga 17 vende do të konkurrojnë për Ariun e Artë dhe të Argjendtë.
