Gjykata e Krimeve të Rënda e shpalli fajtor për tre akuza Fadil Kasëmin dhe e dënoi me burgim të përjetshëm. Avokati i të pandehurit kërkoi rrëzimin e një akuze dhe dënimin me 25 vjet burg.
Gjykata e Krimeve të Rënda Tiranë dënoi të enjten me burgim të përjetshëm Fadil Kasëmin për vrasjen e ish-bashkëshortes së tij, gjyqtares Fildes Hafizi. Trupa gjyqësore, e kryesuar nga Miljana Muça dhe me anëtarë Luan Hasneziri dhe Etleva Dedaj e shpalli vendimin në të njëjtën ditë me konkluzionet përfundimtare të mbrojtjes, e cila kërkoi rrëzimin e një akuze dhe dënimin e të pandehurit me 25 vjet burg.
Gjykata vendosi ta shpallë fajtor të pandehurin për akuzat e vrasjes së ish-bashkëshortes, rrëmbimin e një taksisti dhe armëmbajtjes pa leje, duke i dhënë atij dënimin me burgim të përjetshëm.
Gjyqtarja Fildes Hafizi, nënë e dy fëmijëve u vra nga ish-bashkëshorti më 31 gusht 2017.
Më herët në seancën e së enjtes, avokati mbrojtës i Kasëmit, Ilia Ilia i paraqiti gjykatës konkluzionet përfundimtare, duke kërkuar dënimin e klientit të tij me 25 vite heqje lirie vetëm për dy vepra penale, atë të “vrasjes për shkak të marrdhënieve familjare” dhe “prodhimit dhe mbajtjes pa leje të armëve luftarake dhe municionit”.
Ilia kundërshtoi masën e dënimit, të kërkuar nga Prokuroria dhe kërkoi rrëzimin e akuzës për rrëmbimin apo heqjen e lirisë së taksistit nga ana e Kasëmit, gjatë përpjekjes për t’u larguar në vendi i ngjarjes.
Avokati Ilia theksoi se vrasja për motive xhelozie apo familjare ka pasur gjithmonë lehtësira, ndërkohë që pretendoi se pas divorcit, e ndjera i kishte hequr të drejtën për të takuar fëmijët klientit të tij.
“Këto situata kanë sjellë ndikim në gjendjen psikologjike të të pandehurit, i cili është ndjerë i turpëruar,” pohoi avokati, duke shtuar se Kasëmi është penduar dhe u ka kërkuar ndjesë publike fëmijëve për vrasjen e nënës së tyre.
Gjykata i ka dhënë fjalën edhe të pandehurit Kasëmi, i cili shpjegoi rrethanat e njohjes më të ndjerën dhe vijueshmërinë e jetës së tyre bashkëshortore. Ai pretendoi se e kishte ndihmuar viktimën që të ndiqte studimet e larta për juridik dhe më pas të pranohej në Shkollën e Magjistraturës, duke paguar.
Në këtë moment, kryesuesja e treshes gjykuese, Miljana Muça i ka bërë me dije të pandehurit se ishte duke deklaruar të dhëna për rrethana që mund të kishin të bënin me një tjetër vepër penale. Kasëmi pohoi se u qëndronte deklarimeve të tij.
Pasi shjegoi edhe rrethana të tjera familjare lidhur me ish-bashkëshorten, që sipas tij i kishin krijuar një gjendje të rënduar psikologjike, i pandehuri Kasëmi u shpreh se nëse do ta pyesnin sot se a mund të ndodhte kjo gjë, përgjigja e tij ishte: “jo pasi nuk e kam pasur kurrë plan”.
Vrasja e gjyqtares Fildes Hafizi shkaktoi zemërim në fund të gushtit 2017, edhe për faktin se ajo e kishte denoncuar disa herë dhunën e ish-bashkëshortit Fadil Kasëmi, por institucionet e drejtësisë dështuan t’i ofronin mbrojtje.