Gjykata e Krimeve të Rënda vendosi masën e arrestit me burg për Klement Balilin lidhur me 4 akuzat e ngritura nga Prokuroria e Krimeve të Rënda, ndërkohë që avokati i tij pretendoi se nuk ka asnjë provë që e lidh Balilin me trafikimin e 670 kg kanabis në Greqi.
Rreth orës 14.00 të së enjtes, Klement Balili u pa të hynte i buzëqeshur dhe i shoqëruar nga forca të shumta policie në Gjykatën e Krimeve të Rënda. I akuzuari për trafik ndërkombëtar lëndësh narkotike, i cili u vetëdorëzua në polici pas dy vitesh e gjysmë arrati, u ballafaqua me gjykatën në seancën e vlerësimit të masës së sigurisë.
“Ekzistojnë kushtet dhe kriteret për caktimin e një mase sigurie. Kërkesat për revokimin e masës apo zëvendësimin e saj janë të pabazuara në ligj,”deklaroi gjyqtarja Miljana Muça.
Seanca gjyqësore u zhvillua pjesërisht e hapur për median dhe më pas, me kërkesë të prokurorit Eneid Nakuçi u vendos që ajo të vazhdonte me “dyer të mbyllura”.
Pas përfundimit të seancës së verifikimit të masës së sigurisë, një prej avokatëve mbrojtës të Balilit, Theodhori Sollaku deklaroi për mediat se klienti i tij është i pafajshëm dhe se organi i akuzës nuk ka asnjë provë ndaj tij për përfshirjen në trafikun e lëndëve narkotike.
“Nuk ka asnjë provë, direkte, indirekte apo indicie që Klemend Balili të jetë i përfshirë në trafikimin e 670 kg lëndë narkotike e kapur në ishullin Zakinthos,” tha Sollaku, duke shtuar se do ta ankimojë vendimin.
Në ambientet e jashtme të gjykatës kanë qenë të pranishëm edhe dhjetra familjarë të Klemend Balilit.
Ndaj Balilit rëndojnë katër akuza; “trafikim i lëndëve narkotike në bashkëpunim, “pjesëmarrje në grupin e strukturuar kriminal”, “refuzim për deklarim, mosdeklarim, fshehje ose deklarim i rremë i pasurive”, si dhe “pastrimi i parave”.
Klemend Balili, 47 vjeç ishte në arrati nga drejtësia greke që nga maji i vitit 2016. Ai u vetëdorëzua të martën e kësaj jave. I etiketuar si “Escobari Ballkanit” dhe si simbol i lidhjes së politikës me krimin, ai arriti t’u shpëtojë një sërë operacionesh policore.
Ministri i Brendshëm, Sandër Lleshaj konfirmoi lajmin e dorëzimit në një konferencë për shtyp të martën, ndërsa u përpoq ta paraqesë dorëzimin si rrjedhojë e presionit policor.
“Policia shqiptare ka finalizuar sot një operacion të gjatë, të ndërlikuar dhe shumë të rëndësishëm, për dorëzimin e Klement Balilit, pas një procesi operativo-gjurmuese, në bashkëpunim me shërbimin sekret shqiptar dhe me partnerët tanë,” deklaroi Lleshaj para gazetarëve, të cilët nuk e humbën kontradiktën mes faktit që ai u dorëzua vetë, ndërsa ministri Lleshaj e paraqiti ngjarjen si “operacion policor”.
Pyetur mbi këtë kontradiktë, Lleshaj shtoi: “Për këdo që njeh sadopak punën operative gjurmuese dhe natyrën e operacioneve të tilla për ndalimin e personave të këtij karakteri, besoj do të jetë e qartë që kurrë nuk mund të ketë një dorëzim vullnetar të një personi të kriminalizuar në këtë nivel drejt stacioneve të policisë.”
Balili u kthye në një telash për politikanët shqiptarë përgjatë dy viteve e gjysmë në arrati, pasi institucionet ndërkombëtare ia rikujtuan shpesh atyre mos arrestimin si një tregues i dështimit të luftës kundër krimit të organizuar.