Tre automjete janë djegur gjatë natës në zonën e njohur si ‘Uji i Ftohtë’ në Vlorë. Policia njoftoi se kishte dyshime që automjetet ishin djegur qëllimisht.
Tre automjete janë djegur gjatë natës në zonën e njohur si ‘Uji i Ftohtë’ në Vlorë. Policia njoftoi se kishte dyshime që automjetet ishin djegur qëllimisht me lëndë djegëse. Në një njoftim për shtyp policia tha se makinave u ishte vënë flaka rreth orës 01:58 të 26 janarit 2019.
Sipas policisë makinat një Smart dhe një Audi ishin në pronësi të Ervis H., ndërsa një Land Rover është në pronësi të hallës së tij. Pronarët e makinave të djegura kanë në bashkëpronësi një lokal pranë gjykatës së Vlorës. Policia thotë se zjarrvënia është e qëllimshme pasi makinat nuk ishin pranë njëra tjetrës.
Nga kqyrja e kamerave të sigurisë pranë parkimit mësohet se fillimisht ka marë flakë Audi, më pas Smarti dhe në fund Land Roveri. “Grupi hetimor po vijon punën për përcaktimin e shkakut të rënies së zjarrit. Po shikohen kamerat e sigurisë për të zbuluar detaje të ngjarjes”, njoftoi policia.
Ervis H. nuk rezulton të jetë person i skeduar apo dyshuar si i përfshirë në aktivitete të jashtëligjshme dhe sipas policisë ai ka mohuar përfshirjen në ndonjë konflikt. Policia tha se po hetohej për konfliktet që lidhen me pronat e familjes së të riut.
Djegia e makinave në Vlorë është kthyer në një rutinë. Vetëm në vitin 2018 janë identifikuar mbi 10 raste makinash të djegura qëllimisht pas konflikteve të ndryshme. Ndërkohë në vitin 2017 veç djegieve të mjeteve pati edhe një numër shpërthimesh me eksplozivë.