Ish-drejtuesi i Policisë së Vlorës, në kërkim prej një viti për çështjen e grupit të Habilajve ka kundërshtuar nga arratia kërkesën e prokurorisë për shtyrjen e afatit të hetimeve.
Ish-drejtuesi i Policisë së Vlorës, Jaeld Çela, i akuzuar për përfshirje në trafikun ndërkombëtar të narkotikëve si pjesë e grupit të “Habilajve”, kundërshton nga arratia shtyrjen e afateve të hetimit. Të martën në orën 11:00 u zhvillua seanca gjyqësore lidhur me shqyrtimin e kësaj kërkese, kur me kërkesë të prokurorit të çështjes Dritan Prençi seanca vazhdoi me dyer të mbyllura. I hetuari Jaeld Çela, u përfaqësua nga avokati Gentjan Rumano. Pas rreth një ore, gjyqtarja e Gjykatës së Krimeve të Rënda Liljana Baku vendosi të shtyjë seancën për dhënien e vendimit për pranimin ose jo të kërkesës së Çelës më datë 11 shkurt. Ndërkohë, pritet që më datë 6 shkurt, Gjykata e Shkallës së Parë për Krimeve të Rënda të shqyrtojë ankimimin e bërë nga ish-Ministri i Brendshëm Saimir Tahiri, i cili dhe ai ka kundërshtuar zgjatjen e hetimeve ndaj tij.
Anëtarët e organizatës së drejtuar nga vëllezërit Habilaj u ndaluan në tetor të vitit 2017 nga autoritetet italiane, teksa po tentonin të trafikonin një sasi të konsiderueshme lënde narkotike nga Shqipëria drejt vendit fqinj. Atëherë u arrestuan Moisi Habilaj, Fatmir Minaj, Meridjan Sulaj dhe u shpall në kërkim Nazer Seitaj, i quajtur si “financieri” i kësaj organizate kriminale. Po në vjeshtën e vitit 2017, në Babicë të Vlorës, në magazinën e Armando Koçerrit u gjetën dhe sekuestruan rreth 4 ton cannabis sativa, episod ky që u shoqërua me procedim penal edhe në Shqipëri.
Pas zbulimit të këtij grupi të strukturuar kriminal nga autoritet e drejtësisë italiane, prokuroria shqiptare shpalli në kërkim edhe disa drejtues të policisë së Vlorës, të cilët dyshohet se bashkëpunonin dhe u jepnin ndihmë në trafikun e drogës vëllezërve Habilaj. Ish-kreu i Policisë së Vlorës, Jaeld Çela, Sokol Bode dhe Gjergji Kohila janë aktualisht në kërkim.
Ndërsa çështja penale ndaj ish-ministrit Tahiri filloi në tetor 2017, pas publikimit të disa përgjimeve të kryera nga policia italiane, e cila arrestoi anëtarë të grupit Habilaj. Në përgjime përmendej ndër të tjera edhe emri i ish-ministrit të Brendshëm dhe po ashtu aludohej se për të ishin blerë dhurata.
