Autoriteti Rrugor Shqiptar deklaroi se ka vendosur skualifikimin e të gjithë pjesëmarrësve në tenderin e shumëdebatuar për shkak se “nuk plotësojnë kriteret” ndërsa nuk dha shpjegime se për çfarë kriteresh bëhet fjalë.
Tenderi kontrovers për ndërtimin e një mbikalimi në zonën e njohur si “Shqiponja” në Tiranë do të duhet të përsëritet për herë të tretë pasi herën e parë u fitua nga një kompani fantazmë ndërsa Autoriteti Rrugor Shqiptar deklaroi të enjten se në tenderin e dytë asnjë nga kompanitë pjesëmarrëse “nuk ka plotësuar kriteret”.
Drejtoresha e re e ARRSH Sonila Qato deklaroi për mediat vendimin e skualifikimit të të gjithë pjesëmarrësve.
“Komisioni i Vlerësimit të Ofertave u ka ofruar të gjitha kompanive skualifikimin e ofertave të paraqitura, pasi nuk plotësojnë kriteret,” deklaroi Qato pa bërë të ditur se çfarë kriteresh nuk plotësoheshin.
Tenderi i parë për ndërtimin e mbikalimit me fond limit 2.25 miliardë lekësh i hapur në shtator 2018, u fitua nga kompania DH Albania, e cila ishte edhe ofertuesja e vetme. Oferta e kësaj kompanie ishte vetëm 297 lekë më pak se sa fondi limit i përcaktuar në tender.
Partia Demokratike në opozitë e denoncoi tenderin menjëherë si korruptiv duke deklaruar se fituesja ishte një kompani fantazmë. Por Autoriteti Rrugor Shqiptar deklaroi se DH Albania ishte dega në Shqipëri e një gjigandi amerikan me mijëra të punësuar dhe me miliarda dollarë xhiro.
Vetëm në dhjetor, emisioni TPZ në News 24 publikoi të dhëna që tregonin se kompania ishte me të vërtetë fantazmë dhe se ajo kishte furnizuar në ARRSH një tufë me dokumente të falsifikuara.
ARRSH pranoi se dokumentet ishin të falsifikuara dhe vendosi të rihapë tenderin. Nuk ka të dhëna zyrtare, por raportimet në media tregojnë se në tenderin e dytë morën pjesë pesë kompani, nga të cilat, katër shqiptare dhe një maqedonase. Ofertat e hedhura varionin nga 1.77 miliardë në 2.24 miliardë lekë, duke treguar konkurrencë reale.
Mes kompanive ofertuese janë edhe dy kompani që kanë fituar nga qeveria shqiptare të drejta koncesionare. Gjoka Konstruksion ka fituar koncesionin e ndërtimit të rrugës së Arbrit, ku përfshihen ura dhe tunele ndërsa ANK është në proces negocimi për një kontratë tjetër koncesionare për segmentin rrugor Milot-Balldren. Mbetet e paqartë se si dy kompani që kanë fituar kontrata koncesionare me vlerë qindramilionë euro, nuk janë në gjendje të plotësojnë kriteret e një tenderi me vlerë 18 milionë euro.
