Prokuroria e policia njoftuan finalizimin e një operacioni të koduar “Rruga e gabuar” me arrestimin e 32 personave, pjesë e një grupi të strukturuar të falsifikimit të dokumenteve dhe trafikimit të emigrantëve për në SHBA, Kanada e Britani. Operacioni u ndihmua nga agjentë e sigurisë së Shërbimit Diplomatik pranë Ambasadës Amerikane.
Policia Shtetit dhe Prokuroria pranë Gjykatës së Shkallës së Parë për Krimet e Rënda njoftuan mbrëmjen e të shtunës finalizimin e një operacioni të nisur në mars të vitit 2018 për goditjen sipas tyre të një grupi të strukturuar kriminal që mundësonte dhënien e ndihmës për kalimin e paligjshëm të kufijve me anë të dokumenteve të falsifikuara që i prodhonin vetë.
Operacioni i shtrirë në 13 qytete të Shqipërisë solli arrestimin e 32 personave. “Gjatë këtij operacioni janë arrestuar 32 shtetas shqiptarë, mes tyre 1 punonjës policie, si dhe janë shpallur në kërkim 4 shtetas të tjerë”, njoftoi policia. Nga të arrestuar 28 janë lënë me masë paraprake sigurie në burg, ndërsa 4 janë me masë sigurie arrest shtëpie.
Policia tha po ashtu se u zbuluan dhe sekuestruan 4 laboratorë në territorin e Shqipërisë që shërbenin për falsifikimin e dokumenteve, pajisjeve të ndryshme si; skaner, fotokopje, një sasi e madhe parash cash, certifikata, karta identiteti, një numër i konsiderueshëm dokumentash të personave si dhe një armë zjarri automatike.
Ndalimet janë kryer për veprat penale “Falsifikimi i letërnjoftimeve, i pasaportave ose i vizave”, “Falsifikimi i vulave, i stampave ose i formularëve”, “Ndihma për kalim të paligjshëm të kufijve”, si dhe “Grupi i strukturuar kriminal”.
Sipas policisë operacioni u zhvillua në disa qytete dhe u përfshinë rreth 250 punonjës policie: në Sarandë, Delvinë, Gjirokastër, Tepelenë, Përmet, Vlorë, Fier, Berat, Lushnjë, Krujë, Elbasan, Tiranë dhe Korçë. Po ashtu operacioni u realizua edhe me ndihmën e agjentëve të sigurisë së Shërbimit Diplomatik të atashuar në Ambasadën Amerikane(DSS).
Arrestimi i 32 personave dhe shpallja në kërkim e 4 të tjerëve është kryer në vijim të një procedimi të mëparshëm që në mars të vitit 2018 çoi në goditjen e pjesës tjetër të grupit, kur u ndaluan e shpallën në kërkim 16 persona gjithsej.
Sipas policisë, nga veprimet hetimore të kryera ka rezultuar se të proceduarit, në bashkëpunim me njëri-tjetrin në kuadër të grupit të strukturuar kriminal siguronin persona, të cilët kishin interes për të udhëtuar në shtetet e Bashkimit Evropian, si edhe atyre që iu ishte ndaluar hyrja në një nga vendet e hapësirës SCHENGEN.
Ata akuzohen se pasi i pajisnin persona të ndryshëm me dokumente identifikimi të falsifikuara, kundrejt përfitimit monetar dhe u krijonin kushtet në mënyrë të paligjshme të udhëtonin drejt vendeve të BE-së, me linja ajrore ose tokësore e më pas drejt SHBA-së, Kanadas dhe Mbretërisë së Bashkuar, duke paguar shuma të konsiderueshme nga 10 mijë paund për në Mbretërinë e Bashkuar, deri në 20 mijë euro për në SHBA e Kanada.
“Ky grup kriminal ka pajisur me dokumente të falsifikuara edhe shtetas me rrezikshmëri të lartë shoqërore”, thuhet në njoftimin e policisë.
Nga hetimet ka rezultuar se nisja e personave me dokumente të falsifikuara bëhej nga Shqinëria, Mali i Zi, Italia, Greqia, Franca dhe Norvegjia. Ndërkohë janë dokumentuar disa episode kur janë falsifikuar dokumente të udhëtimit dhe u është dhënë ndihmë për kalim të paligjshëm të kufirit disa personave.
Ndërsa punonjësi i policisë i proceduar, akuzohet se ka kryer veprime korruptive si dhe ka ndihmuar pjesëtarët e këtij grupi kriminal duke shfrytëzuar të dhënat që dispononte për shkak të detyrës në një pikë kontrolli kufitar.
