UNICEF reagoi të hënën lidhur me dy rastet e abuzimit seksual të minoreneve në Shqipëri, duke bërë thirrje për ruajtje të privatësisë dhe dinjitetit të fëmijëve në qendër të dhunës seksuale.
Fondi i Organizatës së Kombeve të Bashkuara për Fëmijët (UNICEF) në Tiranë lëshoi të hënën një deklaratë mediatike ku shprehu shqetësim për trajtimin publik të dy rasteve të abuzimit seksual të fëmijëve.
UNICEF e cilësoi dhunën seksuale shkelje të rëndë të të drejtave të fëmijëve, si dhe sulm ndaj vlerave të përbashkëta.
“UNICEF shpreh shqetësimin e tij të thellë lidhur me rastet e fundit të dhunës së rëndë kundër fëmijëve. Në disa prej këtyre rasteve, çështjet më të ndjeshme u shpërfillën dhe në vend të kësaj, privatësia dhe dinjiteti i fëmijëve u shfaqën publikisht në mënyrë të përsëritur,” deklaroi UNICEF për mediat.
“Dhuna seksuale çon në shqetësime fizike dhe emocionale, dhe shpesh humbje të parevokueshme të dinjitetit dhe vetëbesimit,” paralajmëroi organizata.
Opinioni publik shqiptar u trondit thellësisht nga publikimi në media i dy rasteve të abuzimit seksual me në qendër vajza të mitura.
Një punonjës i policisë së Shkodrës u arrestua të hënën pas publikimit në media të një video sipas të cilës ai kishte kryer abuzime seksuale me një të mitur në Malësi të Madhe.
Një javë më parë në qytetin e Kavajës u zbulua abuzimi seksual i një të miture nga një grup i dyshuar shokësh të shkollës përkundrejt shantazhit.
Disa dhjetëra qytetarë reaguan ndaj rastit të Kavajës duke organizuar të dielën një tubim të heshtur në Tiranë për të dënuar abuzimet me vajzat dhe gratë.
Por vetëm një ditë më pas, një tjetër rast ku përfshihej gjithashtu një minorene u publikua nga portali Newsbomb, duke marrë jehonë të gjerë në media.
Organizata e OKB për fëmijët tërhoqi vërejtjen se përtej përmbushjes së detyrës së raportimit, lajmet me në qendër fëmijët kërkojnë kujdes të shumëfishtë.
“Një publicitet jo i domosdoshëm, i bujshëm për çështje të ndjeshme, mund të shkaktojë trauma më të mëdha të të mbijetuarve, tashmë të shkatërruar prej abuzimit, edhe familjeve dhe komuniteteve të tyre në përgjithësi,” tha UNICEF.
Publikimi i abuzimeve seksuale të minoreneve solli gjithashtu një pingpong akuzash, ku u përfshinë edhe dy partitë më të mëdha në vend PS dhe PD.
Një video e publikuar pak ditë pas ngjarjes së Kavajës nga kryeministri Edi Rama shfaqte ministren e re të Shtetit për Marrëdhëniet me Parlamentin, Elisa Spiropali krah familjarëve të 13-vjeçares së abuzuar, duke sjellë kështu kritika të ashpra në media për shou politik dhe zbulim të identitetit të familjarëve.
“UNICEF-i i bën apel të gjitha institucionet publike dhe jopublike, anëtarët e komunitetit, profesionistët për mbrojtjen e fëmijëve dhe gazetarët që të mbajnë interesin më të lartë të fëmijës, të garantuar me Konventën e Kombeve të Bashkuara për të Drejtat e Fëmijës si dhe në Ligjin Shqiptar “Për të drejtat dhe mbrojtjen fëmijës” në zemër të etikës së tyre profesionale”.
“Respektimi i privatësisë së fëmijëve, dinjiteti, mirëqenia e tyre mendore dhe fizike, duhet të vendosen mbi të gjitha motivet që na shtyjnë në qëndrimin tonë profesional ose personal,” përfundoi deklarata.
