Kolegji i Apelimit shtyu me tre javë seancën e radhës ndaj gjyqtarit të Gjykatës së Lartë, Edmond Islamaj për ti dhënë kohë mbrojtjes dhe Komisionerit Publik të shprehen mbi dy analiza të reja financiare.
Kolegji i Posaçëm i Apelimit i përbërë nga Luan Daci si kryesues, Sokol Çomo relator dhe anëtarë gjyqtaret Ina Rama, Rezarta Schuez dhe Albana Shtylla, mbajti të martën seancën e shtatë ndaj gjyqtarit të Gjykatës së Lartë, Edmond Islamaj.
Seanca zgjati vetëm pak minuta, kohë gjatë së cilës trupa gjykuese i shpërndau palëve dy analiza të reja financiare të përgatitura nga stafi i Kolegjit – një analizë mbi të ardhurat dhe shpenzimet e gjyqtarit dhe një aneks me shpenzimet e udhëtimeve të tij jashtë shtetit.
Analizat u urdhëruan nga Kolegji pas administrimit të të dhënave të reja për udhëtimet jashtë shtetit të gjyqtarit Islamaj për periudhën 2004-2008. Kolegji vendosi t’i japë kohë deri në 5 mars gjyqtarit Islamaj dhe Komisionerit Publike Florian Ballhysa, që të shprehen mbi analizën e re financiare.
Ankimi i Komisionerit Publik Florian Ballhysa kundër vendimit për konfirmimin e gjyqtarit Edmond Islamaj, ishte ankimi i parë ndaj një vendimi rivlerësimi të KPK-së në Kolegjin e Posaçëm të Apelimit. Shqyrtimi i këtij anikimi në KPA ka filluar në 12 nëntor dhe është përqendruar ke rivlerësimi i pasurisë së gjyqtarit.
Islamaj ka një karrierë të gjatë në gjyqësorin shqiptar dhe para se të emërohej në Gjykatën e Lartë, ka mbajtur poste të ndryshme, përfshirë gjykatës i Shkallës së Parë, kryetar gjykate, kryeinspektor në Këshillin e Lartë të Drejtësisë, anëtar i Këshillit të Lartë të Drejtësisë, si dhe gjykatës Apeli.
