Policia e Tiranës njoftoi të dielën se kishte arrestuar 15 protestues dhe shpallur në kërkim shtatë të tjerë. Ata akuzohen për 4 vepra penale, mes të cilave dhe prishje të qetësisë publike.
Policia e Tiranës njoftoi të dielën se ka arrestuar në flagrancë 15 protestues të opozitës si dhe ka shpallur në kërkim shtatë të tjerë për veprat penale të kundërshtimit të forcave të policisë, goditjes për shkak të detyrës dhe shkatërrimit të pronës. Pesë protestues të tjerë po procedohen në gjendje të lirë.
Në njoftimin e policisë së Tiranës thuhet se arrestimet janë kryer pas analizimit të pamjeve filmike, raport- shërbimeve dhe provave të tjera të mbledhura gjatë protestës së të shtunës, ku theksohet se pati akte të dukshme dhune. Protestuesit e arrestuar u përkasin të gjitha grupmoshave: nga 23 deri në 76 vjeç. Mes të proceduarve në gjendje të lirë gjenden gjithashtu edhe 50-vjeçarë.
“Këta shtetas gjatë zhvillimit të tubimit në datë 16 shkurt, pas orës 11:00 kanë çarë kordonin e policisë duke kundërshtuar e goditur punonjësit e policisë, të cilët ishin të planizuar me shërbim për garantimin paqësor të tubimit. Gjithashtu kanë goditur dhe thyer me mjete të forta, dyert, xhamat dhe vepra arti në hyrjen kryesore të Kryeministrisë së Republikës së Shqipërisë,” thuhet në njoftimin e policisë.
Në një prej deklaratave të dhëna të shtunën, kryetari i Partisë Demokratike, Lulëzim Basha akuzoi policinë se e hapi kordonin qëllimisht që të nxiste dhunën. Po të shtunën, ministri i Brendshëm, Sandër Lleshaj kërkoi ndaljen e akteve të dhunës.
Dhjetëramijëra mbështetës të Partisë Demokratike dhe Lëvizjes Socialiste për Integrim u mblodhën të shtunën në bulevardin Dëshmorët e Kombit në Tiranë për të kërkuar dorëheqjen e kryeministrit Edi Rama, të cilin e akuzojnë për korrupsion dhe manipulim të zgjedhjeve.
Një pjesë e protestuese thyen kordonin e policisë dhe sulmuan hyrjen e godinës së Kryeministrisë duke tentuar të hyjnë brenda. Policia ju përgjigj duke hedhur gaz lot sjellës për të shpërndarë turmën.
Protestuesit gjithashtu hodhën gurë dhe fishekzjarrë ndaj një markiza e instaluar nga skulptori, Philipe Parreno, ndërkohë që policia u përgjigj duke hedhur kanistra gazi lotsjellës nga taraca e ndërtesës.
