Prokurorët e Krimeve të Rënda i komunikuan ish-ministrit të Brendshëm Saimir Tahiri akuzat për përfshirje në trafikun e lëndëve narkotike, krjimin e grupit të strukturuar kriminal dhe korrupsion. Tahiri i cilësoi hetimet ndaj tij “të komanduara politikisht”.
Prokurorët e Krimeve të Rënda i komunikuan mesditën e të enjtes rreth orës 13:00 akuzat ish-ministrit të Brendshëm Saimir Tahiri. Prokurorët e akuzojnë Tahirin për përfshirje në trafikun e lëndëve narkotike , krjimin e grupit të strukturuar kriminal dhe korrupsion.
Pasi ka dalë nga ambjentet e prokurorisë ku qëndroi për rreth një orë Tahiri i cili shoqërohej nga avokati i tij Maks Haxhia e quajti hetimin e zhvilluar ndaj tij si “të komanduar politikisht”.
Prokuroria e akuzon Sajmir Tahirin si pjesë e bandës së Habilajve, një grup personash që u arrestuan në Itali dhe Shqipëri, për trafik të sasive të mëdha të kanabisit. Emri i ish-ministrit ishte përmendur edhe më herët në lidhje me të dyshuarit, pasi ai u kishte shitur atyre një makinë e cila vijoi të qarkullonte edhe pas shitjes si e rregjistruar me emrin e tij. Ai po ashtu rezultoi të përmendej edhe në përgjimet e realizuara nga policia italiane gjatë kohës që ajo ndiqte Moisi Habilaj dhe të akuzuar të tjerë të grupit.
Tahiri i ka mohuar akuzat. Ai i ka cilësuar Habilajt kushurij të largët, duke pretenduar se e vetmja marrëdhënie me ta ka qenë shitja e makinës. Pasi doli nga prokuroria ai mbajti të njëjtin qëndrim. “Akuza ishte trafik droge, krijim i grupit të strukturuar kriminal, kryerja e veprave penale në kuadër të grupit të strukturuar kriminal. Unë besoj…, nuk më vjen ndërmend ndonjë tjetër, por pas Aldo Bares unë jam i dyti me këtë akuzë”, tha Tahiri duke ironizuar prokurorinë, të cilën po ashtu e akuzoi për “proces politik”.
“Kur themi i komanduar, kam parasysh politikën, krimin dhe drejtësinë që janë aq bashkë sa është edhe Ati, Biri dhe Shpirti i Shenjtë. Nuk janë ndarë ende dhe unë po e shoh”, pohoi Tahiri para mediave të enjten duke shtuar se drejtësia italiane i ka dhënë të drejtë duke mos gjetur lidhje mes tij dhe anëtarëve të grupit të “Habilajve”.
Prokuroria për Krime të Rënda bëri me dije të mërkurën se kishte përfunduar hetimet ndaj ish-Ministrit të Brendshëm Saimir Tahiri dhe ish-zyrtarëve të lartë të policisë të dyshuar si të përfshirë në trafikun e drogës me bandën e Habilajve.
Ky veprim i organit të akuzës erdhi pas vendimit të gjykatës tre javë më parë, që i kufizoi kohën prokurorëve të Krimeve të Rënda Vladimir Mara dhe Dritan Prençi që po hetojnë ish-Ministrin e Brendshëm Sajmir Tahiri, duke u kërkuar atyre që të dalin me një vendim përfundimtar deri më datë 10 mars.
BIRN ka mësuar se në dosjen në ngarkim të Tahirit, veç të dhënave të siguruara nga drejtësia italiane janë pasqyruar edhe datat e udhëtimeve të ish-ministrit të brendshëm në vendet fqinj.
Më herët më 17 janar 2019, Prokuroria për Krime të Rënda vendosi shtyrjen e afateve të hetimit me tre muaj të tjerë për Tahirin, në pritje të përgjigjeve të letër-porosive të dërguara nga autoritetet e drejtësisë italiane dhe atyre të Malit të Zi. Po ashtu u vendos shtyrja e hetimit edhe për Jaeld Çelën, por të dy ata vendosën të kundërshtojnë me ankim në gjykatë.
Ish-Ministri i Brendshëm Saimir Tahiri dhe ish-kreu i Policisë së Vlorës, Jaeld Çela akuzohen nga Prokuroria e Krimeve të Rënda për implikim në trafikun e narkotikëve, e kryer nga një organizatë e krimit të organizuar e drejtuar nga vëllezërit Habilaj.
Tahiri i ka mohuar akuzat, ndërkohë që ish-kreu i Policisë së Vlorës ndodhet prej një viti e gjysmë në arrati së bashku me dy drejtues të tjerë të policisë lokale, Gjergji Kohila dhe Sokol Bode.
Anëtarët e organizatës së drejtuar nga vëllezërit Habilaj u ndaluan në tetor të vitit 2017 nga autoritetet italiane, teksa po tentonin të trafikonin një sasi të konsiderueshme lënde narkotike nga Shqipëria drejt vendit fqinj. Po në vjeshtën e vitit 2017, në Babicë të Vlorës, në magazinën e Armando Koçerrit u gjetën dhe sekuestruan rreth 4 ton cannabis sativa, episod ky që u shoqërua me procedim penal edhe në Shqipëri.
Çështja penale ndaj ish-ministrit Tahiri filloi në tetor 2017, pas publikimit të disa përgjimeve të anëtarëve të grupit “Habilaj”, të cilët përmendnin emrin e Tahirit dhe aludonin se i kishin blerë dhurata. Gjatë kësaj periudhe Prokuroria e Krimeve të Rënda e ka shtyrë pesë herë afatin e hetimeve, duke pretenduar se ishte në pritje të marrjes së letër-porosive nga Italia dhe Mali i Zi.
Tahiri ishte akuzuar edhe më herët për lidhje me vëllezërit Habilaj, me të cilët ka edhe një lidhje farefisnore dhe u kishte shitur një makinë, të cilën më pas e kishte ri përdorur, por një hetim mbi këtë u mbyll pa rezultat.
