Këshilli i Emërimeve në Drejtësi shpalli të premten hapjen e procedurës së aplikimit në pozicionin vakant të Inspektorit të Lartë Drejtësisë.
Në njoftimin e KED ftohet çdo i interesuar, që plotëson kushtet dhe kriteret e parashikuara në nenin 147/d të Kushtetutës dhe në nenin 199 të ligjit nr. 115/2016, të marrë pjesë në këtë procedurë konkurrimi publik dhe të paraqesë shprehjen e vullnetit për të kandiduar në pozicionin vakant për “Inspektor i Lartë i Drejtësisë”.
Veç kërkesës me shkrim për shprehjen e interesit për kandidim, kandidati duhet të paraqesë edhe jetëshkrimin e përditësuar; fotokopje të kartës së identitetit; deklaratë personale motivimi dhe dokumentacionin shoqërues nëpërmjet të cilit vërteton përmbushjen e kushteve dhe kritereve të përcaktuara në legjislacionin përkatës; formularin e aplikimit të plotësuar “Për informim përpara emërimit/zgjedhjes në poste të larta” dhe formularin e vetëdeklarimit të plotësuar dhe nënshkruar sipas përcaktimeve të ligjit nr.138/2015 “Për garantimin e integritetit të personave që zgjidhen, emërohen ose ushtrojnë funksione publike”. KED njofton se ky formular gjendet i publikuar në faqen elektronike të Gjykatës së Lartë, në pjesën e posaçme për Këshillin e Emërimeve në Drejtësi.
Sipas KED, kërkesa dhe gjithë dokumentacioni i sipërcituar, duhet të paraqitet brenda datës 20 Mars 2019 dhe të dorëzohen në Gjykatën e Lartë, pranë zyrës së posaçme të Këshillit të Emërimeve në Drejtësi. Edhe kandidatët e deritanishëm, që kanë aplikuar sipas procedurave kalimtare kushtetuese dhe ligjore, duhet të paraqesin dokumentacionin e sipërcituar, të përditësuar, thuhet në njoftim.
Deri tani, dy kandidatë janë vetofruar për pozicionin “Inspektor i Lartë i Drejtësisë”- gjyqtari pranë Gjykatës Administrative të Apelit Tiranë, Artur Malaj dhe is-inspektorja e KLD-së Marsida Xhaferllari. Gjyqtari Artur Malaj kaloi vetingun në Shkallën e Parë, por pas rekomandimit të ONM-së edhe Komisioneri Publik i cilësoi kontradiktore arsyetimet e Komisionit të Pavarur të Kualifikimit për pasuritë e gjyqtarit Artur Malaj, përfshirë edhe vilën 3-katëshe në Vlorë për të cilën Komisioneri thotë se “është e paqartë se kush, kur dhe pse u ndërtua”. Ndërsa Xhaferllari do të përballet me vetingun në seancë dëgjimore të hënën, më datë 4 mars.
