Salianji është i akuzuari i katërt për audio-përgjimin denoncues ndaj vëllait të ish-ministrit Fatmir Xhafaj. Ish-deputeti demokrat: Jam nën akuzë për denoncimin tim të faktuar ndaj qeverisë.
Prokuroria e Krimeve të Rënda vendosi të marrë të pandehur për “kallëzim të rremë” Ervin Salianjin, ish-deputet i Partisë Demokratike që pas dorëzimit të mandatit. Salianji është i pandehuri i katërt i çështjes së audio-përgjimit, ku aludohej se vëllai i ish-ministrit të Brendshëm, Fatmir Xhafaj bisedonte me një trafikant lëndësh narkotike; audio-përgjim që sipas Prokurorisë është i sajuar.
I kontaktuar nga BIRN, ish-deputeti Salianji ironizoi vendimin e Prokurorisë, duke kujtuar që “trafikanti ndërkombëtar që e ka kallëzuar është në burg, ndërsa vëllai i tij ministër është shkarkuar”.
“Sot jam nën akuzë për denoncimin tim të faktuar ndaj qeverisë. Ky rast më bën të luftoj edhe më shumë që padrejtësia mos kthehet normë në shoqëri dhe që ligji të jetë i barabartë për të gjithë dhe jo të përdoret si instrument për të kërcënuar denoncuesit,” reagoi Salianji.
Denoncimi në fjalë u bë publik në maj në një konferencë për shtyp të thirrur nga Partia Demokratike. PD publikoi “audio-përgjimin”, duke thënë se Agron Xhafaj, i dënuar më parë në Itali për drogë, ishte angazhuar sërish në trafik narkotikësh. Denoncimi u përgënjeshtrua nga ish-ministri i Brendshëm dhe kryeministri Edi Rama, të cilët pretenduan që në fillim se zëri në audio nuk ishte i Agron Xhafajt.
Megjithatë, Agron Xhafaj deklaroi përmes një letre publike se po dorëzohej për të kryer dënimin në Itali, pasi kishte dorëzuar zërin për ekspertizë në Prokurorinë e Krimeve të Rënda.
Prokuroria i nisi fillimisht hetimet për trafik narkotikësh, por i devijoi më pas ato ndaj personazheve të përfshirë në audio-përgjim, të cilët u akuzuan për kallëzim të rremë të kryer në bashkëpunim. Me kërkesë të saj, Gjykata e Krimeve të Rënda vendosi masën e arrestit me burg për Albert Veliun, i njohur edhe si Babale dhe Fredi Alizotin si dhe masën e detyrimit për paraqitje për gazetarin Jetmir Olldashi.
Vendimi i Prokurorisë së Krimeve të Rënda për të marrë të pandehur Salianjin u komentua edhe nga Partia Demokratike përmes një njoftimi për shtyp.
“Edi Rama dhe prokuroria e tij politike nuk do t’ia mbyllin dot gojën opozitës! Partia Demokratike është e vendosur të denoncojë çdo aferë që provon se Qeveria Rama është produkt dhe peng i krimit të organizuar,” thuhet në deklaratën e PD-së.
