Policia e Shtetit ka ndaluar në Rinas një shtetas Indian, i cili kërkohet për ekstradim nga autoritetet në vendin e origjinës, i dyshuar se është përfshirë në një skemë pastrimi parash.
Policia e Shtetit njoftoi të premten arrestimin provizor të një shtetasi indian, i shpallur në kërkim ndërkombëtar për pastrim parash. Në njoftim thuhet se shtetasi indian me banim në Nigeri, H.P., 59 vjeç u ndalua nga Interpol Tirana në bashkëpunim me shërbimet e policisë kufitare të Rinasit, teksa ka tentuar të dalë nga territori i vendit tonë. Ndalimi i tij është kryer me qëllim ekstradimi, pasi është shpallur në kërkim ndërkombëtar nga Interpol Ner Delhi/ Indi. Sipas njoftimit të policisë, Gjykata Patiala House/New Delhi, ka lëshuar ndaj këtij shtetasi urdhër arresti për veprën penale “Pastrimi i parave”, parashikuar nga nenet 3 dhe 4 të “Ligjit për Parandalimin e Pastrimit të Parave”. Policia sqaron se veprimet e mëtejshme për ekstradimin e këtij shtetasi do të kryhen nga ZQK Interpol Tirana.
Gjatë ditëve të fundit, disa medie shqiptare raportuan se dy shtetas indianë, vëllezër, pronarë të një kompanie farmaceutike ishin shpallur në kërkim ndërkombëtar nga autoritetet e drejtësisë së vendit të tyre, pasi akuzohen për një skemë pastrimi parash në shumën e rreth 725 milionë dollarëve. Sipas këtyre raportimeve në medie, ata akuzohen se gjatë viteve 2008-2011 kanë marrë këtë shumë parash në formë kredie nga disa banka shtetërore të Indisë, të cilat janë qarkulluar më pas në kompani offshore që dyshohet të jenë themeluar nga dy vëllezërit. Këta të fundit, ndërkohë që kërkoheshin nga drejtësia indiane, kanë arritur të marrin nënshtetësinë shqiptare dhe kanë regjistruar kompani që operojnë në fushën e ndërtimit.
