Bledar Valikaj e fitoi të drejtën për t’u promovuar prokuror përmes një gjyqi kundër Presidencës. KLP votoi pro kërkesës së tij me gjashtë vota pro dhe katër kundër.
Me gjashtë vota pro dhe katër kundër, Këshilli i Lartë i Prokurorisë i hapi rrugën Bledar Valikajt për t’u emëruar prokuror gjatë mbledhjes së të hënës. Valikaj, oficer i policisë gjyqësore dhe bashkëshort i deputetes socialiste, Ermonela Felaj i kërkoi KLP-së që të ekzekutonte vendimin e Gjykatës Administrative të Apelit.
Nëpërmjet një njoftimi për shtyp, KLP bëri me dije se miratoi me 6 vota pro dhe 4 kundër kërkesën e Bledar Valikajt për ekzekutimin e vendimit të formës së prerë të Gjykatës Administrative të Apelit me nr.309 dt.06.02.2019.
Në njoftim sqarohet se kundër miratimit kanë votuar anëtarët Kostaq Beluri, Nurihan Seiti, Arben Dollapaj dhe Bujar Sheshi, të cilët argumentuan kundër marrjes së një vendimi përpara ndjekjes së hapave të tjerë gjyqësorë.
Ndërsa kryetari i KLP-së, Gent Ibrahimi ka sqaruar se Këshilli nuk ka qenë pjesë gjatë shqyrtimit të kësaj çështjeje, thelbi i së cilës sipas tij është tashmë i ezauruar nga gjykata me vendim të formës së prerë. I të njëjtit mendim ka qenë edhe anëtari Tartar Bazaj.
“KLP është e detyruar të zbatojë një vendim të formës së prerë dhe ta kalojë kërkuesin për rivlerësim pranë Komisionit të Pavarur të Kualifikimit,” mësohet të ketë thënë Bazaj.
Bledar Valikaj ishte pjesë e një liste prej 9 kandidatësh që ish-kryeprokurori Adriatik Llalla ia propozoi Presidentit Bujar Nishani për dekretim si prokurorë në nëntor 2015.
Kërkesa për promovimin e Valikajt u rrëzua në heshtje nga Presidenti i Republikës.
Valikaj e paditi Presidencën në Gjykatën Administrative, duke pretenduar se kishte plotësuar kriteret dhe kishte fituar konkursin për t’u emëruar prokuror në Kukës, dhe se vendimi i Presidentit ishte i paligjshëm. Pasi e fitoi gjyqin në të dyja shkallët, Valikaj iu drejtua KLP-së me kërkesën për ekzekutimin e vendimit gjyqësor.
Në njoftimin për mediat, KLP tha se vendosi të fillojë procedurat e verifikimit të pasurisë dhe figurës për kandidatin për prokuror, Bledar Valikaj.
“Institucionet e ngarkuara nga ligji me detyrën e verifikimit të pasurisë dhe figurës së kandidatëve për prokurorë janë të ftuar të kryejnë verifikimet e nevojshme jo më vonë se 45 ditë kalendarike nga data e marrjes së shkresave,” përfundon njoftimi i KLP-së.
