Në një seancë paraprake që zgjati tetë orë, Gjykata e Krimeve të Rënda vendosi t’i hapë rrugën shqyrtimit gjyqësor kundër ish-ministrit Saimir Tahiri dhe tre ish-zyrtarëve të Policisë. Tahiri kërkoi pushimin e çështjes, por edhe gjykim të shkurtuar.
Gjykata e Krimeve të Rënda vendosi pas tetë orësh debate që t’i hapë rrugën shqyrtimit gjyqësor për ish-ministrin e Brendshëm, Saimir Tahiri, i akuzuar nga Prokuroria për implikim në trafikun e narkotikëve. Tahiri pritet të gjykohet së bashku me ish-kreun e policisë së Vlorës, Jaeld Çela dhe dy ish-vartësit e tij në arrati, Sokol Bode dhe Gjergji Kohila.
Gjatë seancës paraprake, prokurorët e Krimeve të Rënda, Dritan Prençi, Vladimir Mara dhe Arenc Çela argumentuan akuzat e ngritura, duke kërkuar hapjen e shqyrtimit gjyqësor. Avokati i Tahirit, Maks Haxhia kërkoi pushimin e çështjes, ndërkohë që i drejtoi gjykatës edhe një kërkesë për gjykim të shkurtuar.
Pas diskutimeve mes palëve, gjyqtarja e Krimeve të Rënda, Miljana Muça vendosi të pranojë kërkesën për gjykim të prokurorëve të çështjes, duke i hapur rrugën shqyrtimit gjyqësor kundër Tahirit dhe ish-zyrtarëve të policisë.
Pas daljes nga Gjykata, Tahiri deklaroi për mediat se pavarësisht kërkesës për gjykim të shkurtuar, ai qëndron në pozicionin e tij se nuk ka asnjë lidhje me çështjen.
“Unë kërkova që gjykimi të mos jetë një zvarritje pafund,” tha Tahiri për gazetarët. “Por unë do të vazhdoj të luftoj deri në fund për atë që kam deklaruar edhe më parë se nuk kam asnjë lidhje me këtë histori,” shtoi ai.
Telashet për ish-kreun e Ministrisë së Brendshme, Saimir Tahiri nisën në tetor të vitit 2017, kur Policia italiane goditi një grup të trafikut të narkotikëve, të drejtuar nga vëllezërit Habilaj. Po në vjeshtën e vitit 2017, në Babicë të Vlorës, në magazinën e Armando Koçerrit u gjetën dhe sekuestruan rreth 4 ton cannabis sativa, episod ky që u shoqërua me procedim penal edhe në Shqipëri.
Çështja penale ndaj ish-ministrit Tahiri filloi në tetor 2017, pas publikimit të disa përgjimeve të anëtarëve të grupit “Habilaj”, të cilët përmendnin emrin e Tahirit dhe aludonin se i kishin blerë dhurata. Gjatë kësaj periudhe Prokuroria e Krimeve të Rënda e ka shtyrë pesë herë afatin e hetimeve, duke pretenduar se ishte në pritje të marrjes së letër-porosive nga Italia dhe Mali i Zi.
Tahiri ishte akuzuar edhe më herët për lidhje me vëllezërit Habilaj, me të cilët ka edhe një lidhje farefisnore dhe u kishte shitur një makinë, të cilën më pas e kishte ripërdorur, por një hetim mbi këtë u mbyll pa rezultat.
