Ilir Ciko, një qytetar që publikoi një foto dhe një koment kundër rrjetit të supermarketeve Conad, u akuzua për shpifje nga kompania “Food Trade”, ndërsa në seancën e parë në gjykatën penale Ciko refuzoi kërkesën për pajtim duke deklaruar se i qëndron komentit të bërë në rrjetin social Facebook.
Kompania “Food Trade” ngriti akuza penale për shpifje ndaj një klienti të saj i cili u ankua në rrjetin social Facebook për fshirje të datës origjinale të skadencës së një produkti të importuar nga Italia, proces që filloi në gjykatën penale të Tiranës të martën më 26 mars.
Ciko pati shkruar në Facebook në 2 shkurt se një pako me kërpudha të blera në një nga supermarketet Conad në Tiranë kishte një datë prodhimi në etiketën në shqip bashkë me çmimin ndërsa poshtë saj, në etiketën italiane, data e skadencës ishte fshirë. Ciko ankohet gjithashtu për çmimin shumë më të lartë në lekë në krahasim me çmimin e etiketës origjinale në euro. [Link statusi]
Kompania “Food Trade” angazhoi dy avokatë për të ngritur padi penale për shpifje në bazë të nenit 120 të kodit penal.
Në kërkesën e saj para gjykatës, kompania deklaron se nuk e ka hequr datën e skadencës dhe argumenton se produktet e freskëta nuk mbajnë datë skadence dhe se ajo nuk ka shkelur asnjë ligj.
“I akuzuari, duke përdorur dhëniet e rreme, në mënyrë të qëllimshme ka cenuar nderin dhe dinjitetin e viktimës akuzuese, duke konsumuar në këtë mënyrë elementët e kundravajtjes penale të “Shpifjes”, shkruhet në kërkesën e kompanisë para gjykatës.
Në seancën e parë, gjyqtari i kërkoi palëve të shqyrtonin mundësinë e pajtimit, ndërsa Ciko deklaroi pas gjyqit se i qëndron statusit të tij dhe se do të luftojë akuzën e ngritur në emër të lirisë së fjalës.
“Si çdo konsumator, më 2 Shkurt 2019, kam blerë një produkt ushqimor (kërpudha) në një nga dyqanet (Rruga e Kavajës) e Conad Albania në Tiranë. Produkti kishte etiketën në shqip të vendosur në mënyrë të dyshimtë mbi etiketën origjinale italiane. Pas heqjes së etiketës në shqip, vura re se informacioni mbi skadimin e produktit në etiketën italiane ishte gërvishur duke fshirë datën që ndodhej në të,” deklaroi Ciko.
“I shqetësuar nga një praktikë e tillë, në dukje e padrejtë, mashtruese dhe e dëmshme, kam shkruar një postim në Facebook rreth këtij rasti, duke ngritur pyetjen se kush duhet të mbrojë shqiptarët nga Conad dhe kompani të ngjashme që tregtojnë produkte ushqimore,” shtoi ai.
Akuzat penale për shpifje janë të rralla në Shqipëri për shkak të tendencës së përgjithshme drejt dekriminalizimit të shpifjes si masë për forcimin e lirisë së fjalës. Megjithatë, Kuvendi i Shqipërisë, në vitin 2012, kur u shfuqizua dënimi me burg për shpifje e la në fuqi shpifjen si kundravajtje penale.
