Presidenti Hashim Thaçi njoftoi zgjedhjet lokale në katër komuna me shumicë serbe në Kosovë për të zëvendësuar kryetarët e komunave që dhanë dorëheqjen vitin e kaluar, mes dyshimeve nëse partia kryesore serbe e Kosovës do të marrë apo jo pjesë në zgjedhje.
Presidenti Hashim Thaçi njoftoi të hënën se në maj do të mbahen zgjedhje të parakohshme lokale në katër komunat veriore me shumicë serbe të Kosovës.
“Duke marrë parasysh kërkesën e Ministrisë së Pushtetit Lokal dhe pas konsultimeve me partitë politike dhe Komisionin Qendror të Zgjedhjeve, presidenti sot mori vendim për shpalljen e datës së zgjedhjeve të jashtëzakonshme për komunat e Mitrovicës së Veriut, Zubin Potok, Leposaviq dhe Zvecan,” thuhej në njoftim. Ai tha se zgjedhjet e jashtëzakonshme do të mbahen më 19 maj.
Mbetet e paqartë nëse partia kryesore serbe e Kosovës, Lista Serbe, e cila mbështetet nga qeveria serbe, do të marrë pjesë në zgjedhjet e shpallura. Ajo ende nuk ka konfirmuar qëndrimin e saj dhe nuk iu përgjigj telefonatave të BIRN të hënën.
Agjencia serbe e lajmeve Tanjug njoftoi se zyrtarët e shtetit serb do të takohen të mërkurën me përfaqësuesit e serbëve nga veriu i Kosovës në Beograd.
Vendimi i Thaçit vjen pasi kryetarët e komunave, të gjithë nga Lista Serbe, dhanë dorëheqjen më 17 nëntor, duke shprehur pakënaqësinë e tyre me qeverinë.
Dorëheqjet erdhën pas vendimit të qeverisë së Kosovës për të vendosur një taksë 100 për qind për të gjitha importet nga Serbia dhe Bosnja. Asambleja lokale në të katër komunat në nëntor ndërpreu të gjitha komunikimet me institucionet shtetërore të Kosovës.
Kreu i zyrës së qeverisë serbe për Kosovën, Marko Djuriç, tha se asambletë lokale dhe të gjitha organet e tjera lokale do të pushonin së vepruari derisa qeveria të tërhiqte atë që ai e quajti “masë diskriminuese dhe shkelje të të drejtave të njeriut”.
Kryeministri Ramush Haradinaj refuzoi të pranojë dorëheqjet e kryetarëve të komunave për shkak të “terminologjisë së përdorur në dorëheqje, në përdorimin e termit “Kosovë dhe Metohi”, e cila është e papranueshme për Prishtinën zyrtare”, raportoi Radio Europa e Lirë.
Termi është një shprehje ekskluzivisht serbe për ish-provincën serbe.
Në janar, BIRN raportoi se katër kryetarët e komunave veriore kishin vazhduar të merrnin pagat pavarësisht nga dorëheqjet e tyre.
Qeveria vendosi taksat e importit pasi nuk u bë anëtare e organit ndërkombëtar të policisë, Interpol, gjë e cila dështoi për shkak të asaj që politikanët e Kosovës e quajtën “politikë agresive” të Serbisë për të penguar anëtarësimin e Kosovës në organizatat ndërkombëtare.
Tarifa mbetet në fuqi pavarësisht kundërshtimeve të forta të komunitetit ndërkombëtar dhe thirrjeve për tërheqjen e tarifës, e cila është e domosdoshme për vazhdimin e dialogut të udhëhequr nga BE-ja midis Kosovës dhe Serbisë. Serbia vazhdon të kushtëzojë vazhdimin e dialogut me heqjen e tarifave.
Megjithatë, kryeministri Haradinaj premtoi se tarifa do të mbetet në fuqi derisa Serbia të njohë pavarësinë e Kosovës, të shpallur në vitin 2008. Presidenti Thaçi nga ana tjetër ka bërë thirrje për heqjen e tarifës për të ruajtur “partneritetin” e Kosovës me komunitetin ndërkombëtar dhe SHBA-në në veçanti.
