Drejtuesi i Prokurorisë së Apelit Durrës Ferdinand Elezi u shkarkua nga Komisioni i Pavarur i Kualifikimit. Në seancë dëgjimore u vu në dukje se ai kishte probleme me pasurinë.
Drejtuesi i Prokurorisë së Apelit Durrës, Ferdinand Elezi, u shkarkua të martën nga Komisioni i Pavarur i Kualifikimit, i cili më herët në seancë dëgjimori i pati vënë në dukje probleme në deklarimin e pasurisë.
Trupa gjykuese e KPK-së që përbëhej nga Firdes Shuli kryesuese, Lulzim Hamitaj relator dhe Olsi Komici anëtar, vendosi shkarkimin e Elezit pas hetimit në të tre kriteret.
Gjatë seancës dëgjimore relatori i çështjes, Lulzim Hamitaj deklaroi se Komisioni nuk i kishte gjetur Elezit probleme në kriterin e profesionalizmit dhe atë të pastërtisë së figurës, por gjeti disa probleme në kriterin e pasurisë.
KPK vuri në dukje se ishin problemet me deklarimin e vlerës së një apartamenti 124 metra2 në Tiranë, pasaktësi të kontratave të blerjes së një zyre nga e shoqja dhe ngriti dyshime për trajtim preferencial në lidhje me një apartament 185 metra në Durrës të blerë vetëm për 30 mijë euro.
Gjatë seancës dëgjimore prokurori Elezi ka deklaruar se kjo pasuri është blerë si karabina, e pa përfunduar, për të justifikuar edhe çmimin e lirë, por, komisioni konstatoi se kjo pasuri ka qenë e regjistruar kur ishte blerë.
Elezi e ka filluar karrierën në Prokurorinë e Kavajës në vitin 1999, ndërsa gjatë viteve 2003-2005 ka drejtuar Prokurorinë e Rrethit Durrës dhe më pas atë të prokurorit në Apelin e Tiranës, deri në vitin 2006.
Përgjatë viteve 2006-2013, Elezi ka kryer detyrën e prokurorit në Prokurorinë e Apelit të Durrësit. Prej vitit 2013 ai mban postin e Drejtuesit të Prokurorisë së Apelit Durrës. Ferdinand Elezi ishte një ndër kandidaturat e garës për Prokurorin e Përgjithshëm të Përkohshëm në vitin 2017.