Vetëvendosja po kërkon të bllokojë certifikimin e kandidatëve nga partia kryesore serbe e Kosovës, Lista Serbe, për zgjedhjet e ardhshme lokale të parakohshme në veriun me shumicë serbe të vendit.
Në një takim të Komisionit Qendror të Zgjedhjeve të Kosovës të martën, Vetëvendosja refuzoi të votojë në favor të kandidatëve të certifikuar nga Partia Lista Serbe për të kandiduar në zgjedhjet e 19 majit, duke argumentuar se tre prej tyre kishin shkelur kushtetutën duke dhënë dorëheqjen si kryetarë të të njëjtave komuna në të cilat ata duan të kandidojnë përsëri.
“Unë nuk jam kundër pakicave në Kosovë, por në këtë rast konkret kuptojmë se këto zgjedhje vijnë nga një situatë e jashtëzakonshme. Tre nga katër kandidatë të Listës Serbe janë ish-kryetarë të këtyre komunave,” tha Adnan Rrustemi, një përfaqësues i Vetëvendosjes në Komisionin Qendror të Zgjedhjeve.
“Duhet të theksojmë se këta tre kandidatë kanë vepruar në kundërshtim me kushtetutshmërinë e Kosovës kur kanë dhënë dorëheqjen nga mandatet e tyre,” shtoi ai.
Rrustemi tha se çështja e certifikimit të kandidatëve duhet t’i referohet Gjykatës Kushtetuese dhe Gjykatës së Lartë për t’u siguruar që të gjitha kandidaturat janë të ligjshme dhe kushtetuese, raportoi të martën gazeta Koha Ditore.
Zgjedhjet vendore të parakohshme në katër komuna me shumicë serbe në veri të Kosovës u lajmëruan pasi kryetarët e këtyre komunave dhanë dorëheqjen në nëntor në shenjë proteste kundër vendosjes së tarifave të Prishtinës për importet nga Serbia.
Lista Serbe, e cila mbështetet fuqishëm nga Beogradi, është e vetmja parti që përfaqëson serbët që kanë aplikuar për të kandiduar në zgjedhje, që do të thotë se ka shanse të mëdha për të fituar. Dy parti etnike shqiptare, Vetëvendosja dhe Partia Demokratike e Kosovës, PDK, gjithashtu kanë aplikuar për të kandiduar.
Stefan Veselinoviç, një anëtar i Komisionit Qendror të Zgjedhjeve nga Lista Serbe, tha se partia e tij ka të drejtë të kandidojë këdo që mendon si të përshtatshëm dhe akuzoi Vetëvendosjen për nisjen e një sulmi politik ndaj partisë serbe të mbështetur nga Beogradi.
“Unë mendoj se këtu nuk ka vend për politikë,” shtoi Veselinoviç.
Partia tjetër opozitare kryesore e Kosovës, Lidhja Demokratike e Kosovës, LDK, gjithashtu tha se nuk e mbështeste Vetëvendosjen lidhur me çështjen.
“Aspekti etik dhe politik i kthimit të këtyre kandidatëve në zgjedhje mund të jetë problematik, por nuk kemi ndonjë pengesë ligjore,” tha përfaqësuesi i LDK-së në komisionin zgjedhor, Florian Dushi.
Kandidatët nga Lista Serbe duhet të marrin dy vota nga përfaqësuesit e Vetëvendosjes në komisionin zgjedhor për të marrë certifikimin për të kandiduar në zgjedhje.
E marta ishte dita e fundit në të cilën kandidatët mund të certifikoheshin, vetëm në rast se komisioni vendos ta zgjasë afatin.