Kryetari i Bashkisë së Dropullit deklaron pasuri totale prej 18.7 milionë lekësh, ndërkohë që kursimet nga emigracioni në gjendje cash përbëjnë zërin kryesor të aseteve të tij.Ahilea Deçka u zgjodh kryetar i bashkisë së Dropullit në zgjedhjet e vitit 2015, si përfaqësues i Partisë Demokratike dhe i Aleancës Popullore për Punë dhe Dinjitet. Ai rezultoi fitues i garës për të drejtuar bashkinë e minoritetit grek me 46.58% të votave.
Ahilea Deçka ka lindur më 10 shtator 1968 në Gjirokastër. Ai është diplomuar në Institutin e Fiskulturës “Vojo Kushi” në Tiranë dhe ka punuar si mësues për disa vite. Në vitin 1990, Deçka ka emigruar në Greqi ku ka punuar deri në vitin 2000.
Ai është aktivizuar në sektorin privat, ku ka punuar si menaxher i disa kompanive. Ai u rikthye në administratën publike në vitin 2009 si drejtor rajonal i Formimit Profesional Publik në Gjirokastër, ndërsa në vitin 2015 u zgjodh kryetar i bashkisë Dropull. [Lexo CV-në e plotë]
Ky raport është prodhuar nga BIRN pas administrimit të deklaratave të pasurisë nga Inspektoriati i Lartë i Deklarimit dhe Kontrolli të Pasurive dhe Konfliktit të Interesit, ILDKPKI. Ai ka për qëllim bërjen e transparencës mbi pasuritë e kryetarëve të bashkive të vendit në prag të zgjedhjeve lokale të 30 qershorit.
Skeda grafike e mëposhtme paraqet pasurinë familjare të deklaruar nga kryebashkiaku i Dropullit për vitet 2012-2017.
Zoti Deçka deklaroi pasuri familjare me vlerë 16.6 milionë lekë në vitin 2012, kur deklaroi për herë të parë interesat e tij private pranë ILDKPKI. Referuar deklarimeve të tij, ai zotëronte një shtëpi banimi në Jorgucat me vlerë 5 milionë lekë, tokë bujqësore të përfituar sipas ligjit 7501 me vlerë 1.5 milionë lekë, 60 mijë euro të depozituara në një bankë në Greqi nga të ardhurat nga emigrimi, 1.1 milionë lekë likujditete bankare si dhe një automjet me vlerë 700 mijë lekë.
Në fund të vitit 2017, pasuria familjare e Z.Deçka rezulton të jetë 18.7 milionë lekë. Ajo përbëhet nga 6.8 milionë lekë kursime në cash, 5.3 milionë lekë likuiditete bankare, 6.5 milionë lekë pasuri të paluajtshme si dhe automjeti i deklaruar që prej vitit 2012.
Të ardhurat familjare për periudhën deklaruese shënojnë 9.6 milionë lekë. Mbi 53% e të ardhurave kanë si burim pagën e subjektit, ndërsa rreth 40% pagën e bashkëshortes. Familja e kryebashkiakut të Dropullit deklaron gjithashtu 6% të të ardhurave nga pensionet e prindërve.
Përveç analizës për rritjen/uljen e pasurisë, strukturën e aseteve dhe të ardhurave, ky raport paraqet dhe kontrollin aritmetik/logjik të deklarimeve të subjektit si dhe “flamujt e kuq’ që identifikohen gjatë kontrollit. Kontrolli aritmetik/logjik i deklaratave të pasurisë së kryebashkiakut Deçka u krye për 6 vite, nga të cilat vetëm njëra rezulton me probleme.
Kreu i bashkisë së Dropullit ka qenë subjekt i deklarimit të pasurisë prej vitit 2012, megjithatë ai ka përsëritur deklarimin e plotë të pasurive të tij me marrjen e mandatit në vitin 2015. Nga krahasimi i aseteve të deklaruara para vitit 2015 me ato të deklaruara në vitit 2015, rezulton një diferencë e pambuluar prej 774 mijë lekësh.
BIRN ka identifikuar si “flamur të kuq” në këtë analizë mbajtjen e vlerave të konsiderueshme të parave në cash dhe jashtë sistemit bankar. Më konkretisht, kryebashkiaku Deçka deklaron në vitin 2015 se ka tërhequr nga një bankë në Greqi depozitën 50 mijë euro për shkak të krizës atje, shumë të cilën e deklaron në gjendje cash. Por ligji “për deklarimin dhe kontrollin e pasurive…,” përcakton si kufi ligjor të lejuar jo më shumë se 1.5 milionë lekë në gjendje cash për zyrtarët publikë.
Deklarata e pasurisë Para Fillimit të Detyrës
Deklarata e pasurisë së vitit 2012
Deklarata e pasurisë së vitit 2013
Deklarata e pasurisë së vitit 2014
Deklarata e pasurisë për vitin 2015
Deklarata e pasurisë për vitin 2016
Deklarata e pasurisë për vitin 2017
Për më shumë dokumente vizitoni databazën tonë dokumente.reporter.al