Dy drejtues të opozitës reaguan pas një investigimi të BIRN për shtimin me hapa galopantë të numrit të kontratave të prokurimit publik të klasifikuara si “sekrete” duke e konsideruar fenomenin si “vjedhje dhe korrupsion”.
Grida Duma nga Partia Demokratike dhe Petrit Vasili nga LSI kritikuan qeverinë për rastet e shtuara të prokurimeve të klasifikuara si sekret shtetëror dhe për mungesën e transparencës të kontratave të tjera pasi një investigim i BIRN zbuloi një rritje galopante të rasteve të prokurimeve publike me kontrata të klasifikuara si sekret shtetëror.
” Në ditët e fundit të saj, qeverisja e Edi Ramës mund të përkufizohet me fare pak fjalë: Ajo është qeveria më e korruptuar e tre dekadave të fundit në Shqipëri,” deklaroi Duma në një konferencë për shtyp.
“Gjatë drejtimit të vendit nga Edi Rama jo vetëm që 1 në 3 tendera është dhënë pa garë, jo vetëm kontratat koncesionare prej miliona eurosh mbahen të fshehta, por edhe tenderat e Edi Ramës për miqtë dhe klientët e tij janë sekret shtetëror”, vijoi më tej Duma.
Nënkryetari i LSI Petrit Vasili komentoi në Facebook të hënën atë që e quajti “thellim të frikshëm të skandaleve të qeverisë”.
“Kryeministri është përgjegjës direkt për kontratat sekrete të qeverisë, si vjedhje skandaloze!!!”, deklaroi Vasili.
BIRN zbuloi të hënën se shteti shqiptar ka klasifikuar 236 kontrata prokurimesh publike si sekret shtetëror dhe numri i rasteve është shumëfishuar gjatë viteve të fundit duke shënuar rekord më 2018. [Kliko këtu për të lexuar investigimin] Sasia e parave publike të shpenzuara përmes këtyre kontratave është e panjohur, por disa raste të ditura, si një kontratë me vlerë 1.5 milionë euro me kompaninë Alsig, sugjerojnë se shpenzimet sekrete janë në rendin e disa dhjetëramiliona eurove.
Krahas këtyre kontratave të shpallura sekret, investigimi bëri të ditur se Autoriteti Rrugor Shqiptar refuzoi të bëjë publike kontratat e disa veprave rrugore të reja dhe të vjetra me vlerë dhjetëramilionë euro, me argumentin se kontratat mbartin klauzola konfidencialiteti. ARRSH, një institucion i mbërthyer nga skandali i Unazës së Re në Tiranë, refuzoi edhe një urdhër nga Komisioneri për të Drejtën e Informimit, i cili kërkoi publikimin e kontratave.
Qeveria shqiptare është kritikuar edhe nga Fondi Monetar Ndërkombëtar për mungesë transparence, veçanërisht sa i përket kontratave të koncesioneve, si ajo e Rrugës së Arbrit apo e Rrugës së Kombit, të cilat mbartin anekse të fshehta, të cilat e bëjnë të pamundur të kuptohet nga publiku se çfarë kostosh dhe çfarë përfitimesh pritet të ketë nga zbatimi i këtyre kontratave.
