Gjykata e Apelit të Tiranës rrëzoi kërkesën e Prokurorisë për rikthimin e Ervis Martinajt në qeli dhe e quajti të drejtë vendimin për lirimin e tij në këmbim të garancisë pasurore prej 5 milionë lekësh.
Ervis Martinaj do të vazhdojë të qëndrojë në liri, pasi Gjykata e Apelit të Tiranës vendosi të rrëzojë kërkesën e Prokurorisë të mërkurën dhe të lërë në fuqi masën e garancisë pasurore prej 5 milionë lekësh.
Seanca e vlerësimit të sigurisë nisi në orën 10:00 në Gjykatën e Apelit të Tiranës, me trupë gjyqësore të përbërë nga relatorja Flutura Skënderi dhe anëtarë Gramoz Levanaj dhe Artur Gaxha.
Prokurori i Apelit, Dritan Peka kërkoi rikthimin në qeli të Martinajt; i cili po procedohet për bashkëpunim në vrasje të mbetur në tentativë për ngjarjen e ndodhur më 4 tetor 2018 në lokalin “Monopol” në zonën e ish-Bllokut. Prokuroria ka ngritur gjithashtu ndaj tij akuzat për falsifikim të dokumenteve, organizim të lotarive të palejuara dhe pastrim parash.
Por trupa gjyqësore e Apelit të Tiranës ka lënë në fuqi vendimin e gjyqtarit Artan Gjermeni, i cili vendosi në fillim të majit lirimin e Martinajt kundrejt një garancie pasurore prej 5 milionë lekësh.
Prokuroria e Tiranës e ka cilësuar vendimit e lirimit të Martinajt të pabazuar në ligj si dhe në shmangie të rrezikshmërisë shumë të lartë të veprës penale dhe personit të dyshuar. Në apelimin e vendimit, të siguruar më parë nga BIRN, tre prokurorët e çështjes në shkallë të parë pretenduan se gjykata e hetimeve paraprake nuk ka asnjë tagër dhe mundësi ligjore të të shqyrtojë themelin e çështjes penale, ndërkohë që kjo e fundit ishte në hetim.
Ervis Martinaj akuzohet nga Prokuroria e Tiranës si organizator i konfliktit të armatosur të 4 tetorit 2018 në zonën e ish-Bllokut, ku mbeti i vrarë miku i tij Fabjan Gaxha dhe u plagos Eljon Hato. Ai është në procedim nga Prokuroria për veprat penale të “vrasjes në rrethana të tjera cilësuese”, e kryer në bashkëpunim dhe e mbetur në tentativë, “fshehje e të ardhurave”, “organizimi i lotarive të palejuara”, “vënia në dispozicion e lokaleve për lojëra të palejuara”, “pastrimi i produkteve të veprës penale ose veprimtarisë kriminale” dhe “falsifikim i dokumenteve”.
Para përplasjes së armatosur në lokalin “Monopol” në ish-Bllok, emri i Ervis Martinajt është lakuar për një sërë ngjarjesh të rënda kriminale në Tiranë. Ai është hetuar dhe dënuar tre herë për organizim lotarish të palejuara si dhe u procedua për vrasjen e Enton Nikës në vitin 2015 në Linzë – ngjarje për të cilën Gjykata e Apelit të Tiranës e çliroi nga akuzat.
