Sipas autoriteteve në Shkup, kancelarja gjermane Angela Merkel i ka thënë kryeministrit Zaev se Bundestagu gjerman do të miratojë fillimin e bisedimeve të pranimit të Maqedonisë së Veriut në shtator.
Pas një takimi 40 minutësh me kancelaren gjermane Angela Merkel, Maqedonia e Veriut shprehu optimizëm për caktimin e një date për fillimin e bisedimeve për pranimin në BE, duke thënë se Merkel kishte njoftuar kryeministrin Zorav Zaev se Bundestagu do të miratojë një vendim që mbështet një datë fillimi për bisedimet në shtator.
“Kancelarja theksoi se Maqedonia e Veriut i ka përmbushur pritshmëritë e saj dhe se Berlini ka një këndvështrim shumë pozitiv,” tha qeveria e Maqedonisë së Veriut pas takimit.
Zaev, kreu i një qeverie koalicioni të drejtuar nga social demokratët, ka thënë se vendi i tij “ka besim të plotë te kancelarja Merkel dhe mbështet politikën e saj mbi procesin e zgjerimit të BE-së, si dhe politikën e saj ndaj Ballkanit Perëndimor”.
“Ka një bindje të fortë se ne do t’i nisim këtë vit bisedimet e pranimit në BE,” tha qeveria në Shkup.
Megjithatë, deklarata e shkurtër për shtyp nga qeveria gjermane nuk ofroi ndonjë angazhim konkret. Ajo theksoi vetëm se të dyja palët u përqendruan në marrëdhëniet dypalëshe, si dhe në “çështjet e politikës së jashtme dhe europiane”, duke përsëritur lavdërimin e Berlinit për marrëveshjen historike të vitit të kaluar midis Athinës dhe Shkupit në lidhje me emrin e këtij të fundit.
Vizita e Zaevit në Berlin vjen pasi Bundestagu javën e kaluar nuk arriti të merrte ndonjë vendim për të mbështetur një datë fillimi për bisedimet e pranimit me Maqedoninë e Veriut apo Shqipërinë, duke rrudhur aspiratat e të dy vendeve.
Kjo do të thotë se një debat në lidhje me datën kur do të hapen bisedimet e pranimit me të dy vendet nuk mund të jetë në axhendën e Këshillit Europian më vonë këtë muaj. Çështja tani do të shtyhet më e pakta deri në vjeshtë.
Zaev ka investuar shumë nga kapitali i tij politik në dy vitet e fundit në pushtet për zgjidhjen e mosmarrëveshjes së gjatë me Greqinë, duke mbikëqyrur ndryshimin e emrit të vendit në Maqedonia e Veriut.
Marrëveshja greke zhbllokoi perspektivat e gjata Euro-Atlantike të vendit. Për momentin, megjithatë, progresi mbetet ende shumë u ngadalshëm.
Para takimit me Merkelin, Zaev kujtoi se Maqedonia e Veriut ka qenë një vend kandidat për në BE për 15 vjet dhe përsëriti se pa një datë fillimi për bisedimet e pranimit në BE këtë vit, qeveria e tij pro-europiane rrezikon të humbasë mbështetjen para rivalëve të saj nacionalistë.
Nenad Markoviç, një analist politik dhe profesor universiteti në Shkup, tha për BIRN se pa një datë bisedimesh me BE-në këtë vit, “forcat pro-europiane do të mbeten pa argumente në mbrojtjen e tyre drejt rrugës për në BE”, gjë e cila mund të çojë në një rritje të ndjeshme në euro-skepticizëm dhe populizëm.
Hezitimi i Gjermanisë nuk është i vetmi shqetësim për qeverinë në Shkup dhe atë në Tiranë, teksa kërkojnë të sigurojnë një datë për fillimin e bisedimeve. Franca dhe Holanda mbeten skeptike ndaj zgjerimit të BE-së në përgjithësi.
Të mërkurën në mbrëmje parlamenti holandez miratoi një rezolutë që praktikisht bllokon fillimin e bisedimeve të pranimit të Shqipërisë në BE këtë vit, duke përmendur mungesën e progresit në luftën kundër krimit të organizuar dhe korrupsionit.
Lidhur me Maqedoninë e Veriut, deputetët në Holandë e lanë derën hapur, pasi rezoluta nuk i referohej asaj.
Qeveria në Shkup ka insistuar që dy vendet fqinje nuk duhet të futen në të njëjtin thes kur bëhet fjalë për matjen e arritjeve dhe meritave të tyre.
