Seanca gjyqësore ndaj ish-deputetit demokrat Bardh Spahija dhe 5 të akuzuarve të tjerë u zhvillua nën masa të rrepta sigurie dhe nën thirrjet e mbështetësve të PD-së, që kërkonin lirimin e tyre nga qelitë.
Ish-deputeti i Partisë Demokratike, Bardh Spahija dhe 5 personat e tjerë të ndaluar për sulmin ndaj KZAZ-së nr.3 u dërguan përpara Gjykatës së Shkodrës të shtunën nën masa të rrepta sigurie. Godina e gjykatës ishte rrethuar nga mbështetës dhe ish-deputetë të Partisë Demokratike, të cilët kërkonin lirimin e të arrestuarve, ndërsa një kordon policie me skafandra dhe maska kundragaz u rreshtua para derës së gjykatës.
Seanca gjyqësore e masës së sigurisë u zhvillua pa praninë e medias, familjarëve dhe protestuesve. Trupi gjykues drejtohet nga gjyqtari Tonin Sterkaj.
Ndaj ish-deputetit demokrat, Bardh Spahija prokuroria ka ngritur 6 akuza, që lidhen me kundërshtimin e forcave të policisë dhe shkatërrimin e pronës me zjarr dhe dëmtim të materialeve zgjedhore. Vetë Spahija e cilësoi arrestimin e tij si “prapaskenë politike”.
“Protestuesit kanë vepruar, sepse nuk mund të lejojnë që të uzurpojnë një objekt publik në Bashkinë e Shkodrës nga ana e policisë dhe njerëzve të paautorizuar. Morëm informacion se kishte tension, u drejtuam atje për të qetësuar situatën. Arrestimi im ka prapaskenë politike,” mësohet të ketë thënë Spahija para gjykatës.
Gjyqtari Tonin Sterkaj vendosi ta lërë Spahinë në masën e arrestit të shtëpisë.
Gjykata e Shkodrës vendosi gjithashtu masën e arrestit me burg për 30 ditë për punonjësit e policisë bashkiake, Alfred Nikolli dhe Gentjan Bytyçi. Arrest shtëpie u vendos edhe për Adi Garucin dhe Aleks Ndojin, ndërsa 16-vjeçari Orlando Thepi u lirua me masën e detyrimit për paraqitje pranë oficerëve të policisë gjyqësore.
Ish-deputeti Bardh Spahija dhe 5 protestues të tjerë akuzohen për konfliktin e ndodhur në KZAZ-në nr.3 në shkollën “Shejnaze Juka” në Shkodër më 19 qershor. Ndërsa punonjësit e policisë bashkiake dhe ata të policisë së rendit u përplasën për zhvendosjen e KZAZ-së, të arrestuarit akuzohen se i vendosën zjarrin njërës prej klasave ku ndodheshin materialet zgjedhore.
Kryetarja e Bashkisë së Shkodrës, Voltana Ademi denoncoi zhvillimin e seancës për masat e sigurisë pa praninë e medias dhe të familjarëve të shtunën në Shkodër.
“Jemi në kuadrin e një burgosjeje politike. Në emër të institucionit që drejtoj kam kërkuar të jem e pranishme,” tha Ademi, duke ngritur dyshime se akuzat dhe fletë-arrestet nuk janë inicuar nga policia e Shkodrës apo oficerët e policisë gjyqësore në Shkodër.
