Policia njoftoi se nga shpërthimi i dyshuar i një bombule gazi në një dyqan eventesh katër persona janë plagosur dhe dërguar në spital. Rrethanat e ngjarjes janë ende të paqarta.
Katër persona u plagosën pas një shpërthimi në zonën e ish-Bllokut në kryeqytet. Policia në një njoftim paraprak bëri me dije se S.P, A.P, E.N dhe D.S ishin plagosur dhe ishin dërguar për ndihmë mjekësore në spital, por nuk dha informacion për gjendjen e tyre shëndetësore.
Dëshmitarë okularë thanë se shpërthimi ndodhi në mesditën e të hënës në katin e parë të një dyqani në rrugën “Vaso Pasha”, ngjitur me një argjendari. Shpërthimi duket se ka shkatërruar një pjesë të objektit dhe dyqanet e tjera që ndodhen ngjitur me të.
Policia dhe kalimtarë të rastit nxorrën nga rrënojat të lënduarit. Një vajzë u nxorr nga rrënojat e një prej dyqaneve ngjitur me vendin ku ndodhi shpërthimi.
Rrethanat e ngjarjes janë ende të paqarta. “Rreth orës 13:15 në rrugën “Vaso Pasha” në ambientet e një dyqani eventesh ka shpërthyer një bombul gazi. Si pasojë e shpërthimit janë dëmtuar shtetasit S. P dhe A. P, E. N dhe D.S të cilët u dërguan në Spital për ndihmë mjeksore. Grupi hetimor ndodhet në vendngjarje dhe po vijon punën për sqarimin e rrethanave të ngjarjes”, thuhet në njoftimin paraprak të policisë së shtetit.
Siguria e bombulave të gazit ka qenë edhe më herët objekt debatesh publike, ndërsa shpërthime të ngjashme kanë shkaktuar disa viktima në të gjithë vendin.