Ish-kryeprokurorja e Agjencisë së Anti-Korrupsionit në Rumani, Laura Codruta Kovesi, mesa duket do të bëhet kryeprokurorja e parë e BE-së, pasi mori shumicën e votave nga Këshilli Europian të enjten.
Komiteti i Përfaqësuesve të Përhershëm në BE, COREPER, ka votuar në favor të Laura Codruta Kovesit si kandidaten e tij të preferuar për pozicionin e ri të Kryeprokurores së BE-së, duke i hapur rrugë Parlamentin Europian për të konfirmuar ish-kryeprokuroren e Agjencisë së Anti-Korrupsionit në Rumani në këtë post. Parlamenti ka shprehur vazhdimisht mbështetje për të.
Jean-Francois Bohnert i Francës dhe Andreas Ritter i Gjermanisë ishin gjithashtu në garë. Por në një votim të fshehtë të mbajtur të enjten nga COREPER, i cili është pjesë e Këshillit Europian dhe përfaqëson anëtarët e shtetit në Bruksel, Kovesi mori 17 nga 22 votat e hedhura, duke i lënë pas me vota kandidatët e tjerë.
Rumania me shumë gjasa ishte një nga pesë vendet që nuk votuan për Kovesin, pasi qeveria e Bukureshtit vazhdimisht ka kundërshtuar kandidaturën e saj.
Kryeministrja Viorica Dancila, nga Partia Socialdemokrate, PSD, përsëriti kundërshtimin e qeverisë së saj për Kovesin, duke përmendur hetimet ligjore me të cilat ajo përballet në vendlindje për abuzim detyre gjatë pesë viteve që ajo ishte në krye të Agjencisë së Anti-Korrupsionit.
“Ne nuk e mbështesim këtë mandat,” tha Dancila përpara takimit të COREPER. “Kur ka dyshime për një person, pavarësisht se çfarë pozicioni ai mban, është e nevojshme që ajo t’i sqarojë këto gjëra dhe më pas mund ta marrë këtë post,” shpjegoi kryeministrja.
Puna e Kovesit në Agjencinë e Anti-Korrupsionit u vlerësua nga BE-ja dhe SHBA-ja, pasi ajo paditi qindra politikanë dhe u bë një simbol i luftës kundër korrupsionit në Rumani – një vend i prirur nga rekorde të vogla në këtë fushë.
Por hetimet e saj zemëruan qeverinë e udhëhequr nga PSD-ja, e cila në korrik 2018 e shkarkoi atë nga posti, duke e akuzuar për bashkëpunim me shërbimet e inteligjencës – të cilat janë nën juridiksionin e presidentit – për të shënjestruar politikanët socialdemokratë.
Në shkurt të këtij viti, pasi emri i Kovesi u parashtrua për postin në BE, gjykatat rumune filluan hetimin e saj nën dyshimet për abuzim pushteti, ryshfet dhe dëshmi të rreme. Një muaj më vonë, ajo u thirr për të dëshmuar në një rast të dytë, në të cilin ajo akuzohet se ka organizuar prokurorë që të gjykonin në mënyrë arbitrare disa individë.
Kovesi, opozita e qendrës së djathtë në Rumani dhe Komisioni Europian i shohin hetimet si të motivuara politikisht.
Pas votimit, Kovesi e përshkroi mbështetjen që ajo kishte marrë nga COREPER si “një votë besimi për një shoqëri që ka mbrojtur sundimin e ligjit, pa mbështetjen e të cilës unë s’do t’ia kisha dalë dot mbanë”.
Kovesi, i cili ka marrë mbështetjen e qindra mijëra rumunëve gjatë protestave të shumta antiqeveritare të viteve të fundit, shtoi se votimi gjithashtu do të inkurajonte “të gjithë prokurorët të vazhdojnë të luftojnë korrupsionin”.