Presidenti Ilir Meta dekretoi si anëtare të Gjykatës Kushtetuese pas kalimit të afatit 30 ditor Marsida Xhaferllarin, duke krijuar ngërç për funksionimin e gjykatës, pasi më herët Arta Vorpsi u konsiderua e emëruar në të njëjtin vend vakant.
Presidenti Ilir Meta dekretoi të mërkurën Marsida Xhaferllarin si anëtare të Gjykatës Kushtetuese. Dekreti i cili u bë pas kalimit të afatit 30 ditor prej dorëzimit të listave me kandidatura nga Këshilli i Emërimeve në Drejtësi, pritet të krijojë një ngërç të ri në funksionimin e këtij instititucioni.
Më herët këtë javë Kuvendi, i cili votoi me shumicë për dy anëtare të tjera të Kushtetueses Elsa Toska, dhe Fiona Papajorgji, u shpreh se Arta Vorpsi e cila ishte renditur e para në listën e Këshillit të Emërimeve në Drejtësi për të gjitha vendet vakante cillësohej e emëruar automatikisht pasi Presidentit i kishin kaluar afatet e emërimit.
Ndërkohë të mërkurën, duke iu referuar një letërkëmbimi me KED mbi rradhën e emërimeve në Kushtetuese dhe faktit që Kuvendi kishte zgjedhur dy anëtare, Presidenti dekretoi emërimin në Kushtetuese të Marsida Xhaferllarit. Xhaferllari ishte renditur e katërta në listën e KED, por nga dekreti i presidencës kuptohet se ajo ishte tashmë e dyta për shkak të emërimit të dy garueseve të tjera nga Kuvendi.
Presidenti kundërshtoi procedurën e ndjekur nga KED, duke iu referuar faktit që Kushtetuta paracaktonte një rradhë emërimesh. Sipas kësaj rradhe asnjë nga institucionet nuk mund të përcaktonte dy kandidatë njëherësh dhe se presidenti duhej të merrte një listë të re nga KED pasi Kuvendi të kishte zgjedhur një prej kandidatëve në listën e tij. KED në përgjigje për Metën iu referua dispozitave kalimtare dhe faktit që kishte më shumë se sa një vend vakant.
Nga ana tjetër kundërshtimi i presidencës për të zgjedhur një prej tre të parave në listën e dërguar nga KED, i hapi rrugë mekanizmit zhbllokues të parashikuar po në Kushtetutë që ia dha automatikisht mandatin Arta Vorpsit –e renditur e para nga Këshilli i Emërimeve në Drejtësi. Të hënë para se të votonte për dy vendet vakante, Kuvendi e cilësoi Vorpsin të emëruar.
Përplasja e krijuar mes palëve mund të zgjidhet vetëm nga Gjykata Kushtetuese, e cila ende nuk është funksionale.
