Studimi i PPNEA që u fokusua në zonën e Munellës, kandidate për t'u shpallur si zonë e mbrojtur, gjeti pas një monitorimi 2 vjeçar përmes analizës së imazheve satelitore një sërë problemesh.
Një studim i PPNEA (Shoqata për Ruajtjen dhe Mbrojtjen e Mjedisit Natyror në Shqipëri), gjeti se moratoriumi i pyjeve i hyrë në fuqi në vitin 2016 kishte kufizuar prerjet e pyjeve në sipërfaqe të mëdha, por se prerjet ishin intensifikuar në sipërfaqe të vogla.
Studimi që u fokusua në zonën e Munellës, kandidate për t'u shpallur si zonë e mbrojtur, gjeti pas një monitorimi 2 vjeçarë përmes analizës së imazheve satelitore një sërë problemesh, kryesisht mbi mungesën e identifikimit të zonave ku lejoheshin prerjet e ligjshme dhe intesifikim të prerjeve në disa zona.
“Grupi i punës u përball me një zonë heterogjene, e cila prej vitesh është shfytëzuar dhe shkatërruar nga dora e njeriut. Megjithatë, nga analiza e të dhënave të grumbulluara rezultoi se moratoriumi i pyjeve ka qënë pozitiv në parandalimin e prerjes së pyjeve në sipërfaqe të mëdha, por ato janë intensifikuar në sipërfaqe të vogla (qofshin këto prerje të ligjshme apo të paligjshme)”, thuhet në njoftimin e PPNEA-s.
Organizata po ashtu bëri me dije se kishte mungesë të dhënash mbi parcelat e caktuara nga bashkitë respektive për shfrytëzimin për dru zjarri që sipas saj vështirësoi “identifikimin e saktë të prerjeve të ligjshme apo të paligjshme në rajonin e Munellës”.
Në njoftim PPNEA rekomandon institucionet përgjegjëse të aplikojnë këtë metodologji “për vlerësimin e impaktit të moratoriumit të pyjeve në të gjithë territorin e vendit deri në vitin 2026”. Po ashtu ata rekomandojnë vijimin e monitorimit në Munellë.
Në konkluzionet e studimit paraqitet po ashtu nevoja për një monitorim kombëtar deri në vitin 2026 për të vlerësuar rezultatet e moratoriumit. PPNEA rekomandon po ashtu një kombinim mes mbikqyrjes satelitore dhe asaj në vend sidomos për të identifikuar qartësisht zonat ku është lejuar prerja.
BIRN ka gjetur më herët në disa investigime se moratoriumi nuk ka penguar vijimin e shfrytëzimit të paligjshëm të pyjeve, ndërsa ndëshkimet për shkelësit janë minimale dhe shpesh nuk ekzekutohen.