Prokuroria e Tiranës kërkoi dënimin me 1.6 vjet burg për ish-deputetin demokrat, Ervin Salianji dhe 1 vit burg për Jetmir Olldashin me akuzën e kallëzimit të rremë. Salianji e kundërshtoi akuzën si politike.
Prokuroria e Tiranës i kërkoi të martën gjykatës deklarimin fajtorë të katër të akuzuarve të çështjes së njohur me emrin “Babale”. Për ish-deputetin e Partisë Demokratike, Ervin Salianji u kërkua dënimi me 1 vit e 6 muaj burgim për “kallëzim të rremë”, ndërsa për gazetarin Jetmir Olldashi dënimi me 1 vit burg për të njëjtën akuzë.
Prokurori Genci Qana kërkoi megjithatë para gjykatës që vendimi për Salianjin të pezullohet për një periudhë 3-vjeçare, ndërsa ai për OIldashin të konvertohej në 200 orë punë me interes publik.
Për të pandehurin Albert Veliu u kërkua dënimi me 3 vjet burgim për “kallëzim të rremë” dhe me 1 vit për “kalim të paligjshëm të kufirit shtetëror”. Ndërsa për Fredi Alizotin u kërkua dënimi me 3 vjet heqje lirie për “kallëzim të rremë”.
Pas përfundimit të seancës gjyqësore, ish-deputeti i Partisë Demokratike, Ervin Salianji e cilësoi akuzën e ngritur ndaj tij si politike.
“Nuk i druhem fare, e kam thënë në fillim. Prokuroria politike nuk mori asnjë provë nga ato që kemi dorëzuar. Sot nuk u kërkua dënimi im, ai është kërkuar që kur kam bërë publike çështjen. Askush nuk do ia dalë as të më mposhtë, as të më frikësojë,” tha Salianji.
Ndërsa kryetari i Partisë Demokratike e konsideroi pretencën e Prokurorisë përmes një statusi në Facebook si përpjekje për t’i mbyllur gojën opozitës.
“Për të dënuar Ervin Salianjin që denoncoi me fakte përfshirjen e vëllait të Ministrit të Brendshëm në trafik droge, Edi Rama përdori dy prokurorë të korruptuar, Kolë Hysenaj dhe Genci Qana, që zbatuan sot skenarin e dështuar për t’i mbyllur gojën opozitës”, shkruan Basha në postimin e tij.
Audio-përgjimi i publikuar në maj të vitit 2018 nga Partia Demokratike, në të cilin aludohej se vëllai i Ministrit të Brendshëm bisedonte me një trafikant u cilësua nga prokuroria si e sajuar. Me kërkesë të Prokurorisë së Krimeve të Rënda, Gjykata e Krimeve të Rënda miratoi atëherë masa sigurie “arresti me burg” për Albert Veliun dhe Fredi Alizotin, ndërsa u vendos detyrim paraqitje për gazetarin Jetmir Olldashi. Më pas dosja u nda dhe pjesa që i përkiste veprës penale “kallëzim i rremë” u kalua për kompetencë në Prokurorinë e Tiranës. Ndërkohë, listës së të hetuarve si bashkëpunëtorë në sajimin e audio-përgjimit ju shtua edhe ish-deputeti demokrat Ervin Salianji.
