Gjykata e Fierit caktoi masë sigurie arresti me burg për qëllim ekstradimi ndaj Ahmet Isufajt, pas urdhër arrestit lëshuar nga Kosova.
Gjykata e Fireit caktoi masë sigurie arresti me burg ndaj Ahmet Isufajt, 56 vjeç, i cili kërkohet nga drejtësia e Kosovës pas një vendimit të Gjykatës Themeltare në Prishtinë. Isufaj, u arrestua më 6 dhjetor pasi ishte në kërkim prej autoriteteve në Kosovë, ndërsa masa e sigurisë ndaj tij është vendosur me qëllim ekstradimin.
Masa e sigurisë u kërkua nga prokurori i Fierit Andi Pogaçe, i cili paraqiti edhe provat e sjella nga Kosova. Ndërkohë avokati Vladimir Cjapi kërkoi caktimin e masës “arrest shtëpie” duke paraqitur si arsye gjendjen shëndetësore të të arrestuarit.
Isufaj është xhaxhai i biznesmenit fierak Arben Isufaj i njohur edhe si “Ben Qimja”. Arben Isufaj ka një të kaluar kriminale në shtetin italian dhe është dënuar nga Gjykata e Torinos për trafik ndërkombëtar lëndësh narkotike. Ai u arrestua për t’u ekstraduar në Itali në mars 2014, por kërkesa e autoriteteve italiane u hodh poshtë nga Gjykata e Rrethit Gjyqësor Fier.
Në vendimin e gjykatës për masë sigurie bëhet me dije se ndaj Isufajt autoritetet e Kosovës kishin sjellë një dosje me detaje të hollësishme. Po ashtu aty vihen në dukje se ai ishte shpallur në kërkim që prej korrikut të vitit 2014. Sipas gjykatës për shkak se dënimi i parashikuar për këto akuza ishte i madh, “kishte rrezik ikjeje”” dhe për këtë arsye Isufaj duhej të mbahej me masë sigurie arresti me burg.
